Esirtki jarnamalaǵan Petropavl turǵyny 12 jylǵa sottaldy

PETROPAVL. QazAqparat – Petropavlda sıntetıkalyq esirtkini saqtap, satyp jáne jarnamalaǵany úshin qala turǵyny 12 jylǵa bas bostandyǵynan aıyryldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldyń 29 jastaǵy turǵyny naýryz aıynda ustaldy.

Sotqa deıingi tergeý barysynda buryn esirtki qylmysy úshin sottalǵan onyń «Telegram» messendjeri arqyly jumys istegen anyqtaldy. Onlaın-resýrstyń 3,5 myń oqyrmany bolǵan.

Sıntetıkalyq esirtkini qalanyń yqsham aýdandarynda jasyryp, ony osy jerde satyp otyrǵan.

Birneshe gramm esirtki kúdikti mingen taksı kóligin tekserý kezinde tabyldy. Al negizgi bóligin - 400 gr spaısty polıtseıler onyń páterinen aldy.

Sondaı-aq onyń úıinde sıntetıkalyq esirtkini daıyndaýǵa qajet kontsentrat, elektrondy tarazy, oraýǵa arnalǵan materıaldar, uıaly telefon men noýtbýk bolǵan.

«Tekserý barysynda onyń sıntetıkalyq esirtki satýǵa arnalǵan «Papa mojet» atty ınternet-dúken ashqany anyqtaldy. Alǵash ret ustalǵanǵa esirtki zattaryn elektrondy aqparattyq resýrstarda jarnamalaǵany úshin qylmystyq jaýapkershilik qoldanyldy. Budan basqa qala turǵyny satý úshin spaısty ázirlep, saqtaǵany jáne satqany úshin sottaldy», - deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.

SQO-da jyl basynan zańsyz aınalymnan 398 kg túrli esirtki zattary alyndy, onyń 1,5 kg sıntetıkalyq esirtkiler.