Esirtki zerthanasyn ashqan Aqtóbe turǵyny 6 jylǵa sottaldy
Aqtóbe oblysynyń qylmystyq ister jónindegi mamandandyrylǵan aýdanaralyq sotynda qazan aıynyń sońynda Aqtóbe qalasynyń qylmys jasaǵany úshin kináli dep tanylǵan 48 jastaǵy turǵynyna qatysty qylmystyq is qaraldy. Kúdikti quramynda esirtki zattary bar, ósirýge tyıym salynǵan qarasora ósimdikterin iri mólsherde ósirgen jáne onyń áreketteri QR QK-niń 300-baby 2-bóliginiń 3-tarmaǵy boıynsha durys saralanǵan.
Esterińizge sala keteıik, 2022 jyldyń mamyr aıynyń sońynda Aqtóbe oblysy PD Esirtki qylmysyna qarsy is-qımyl basqarmasynyń qyzmetkerleri saıajaıda ornalasqan jerasty zerthanasyn anyqtaǵan. Onyń ıesi Aqtóbe qalasynyń aýmaǵynda esirtki zattaryn ótkizý maqsatynda quramynda esirtki zattary bar, ósirýge tyıym salynǵan ósimdikterdi zańsyz ósirýmen aınalysqan. Narkolaboratorııa tehnıkanyń sońǵy úlgilerimen jabdyqtalǵan.
Ustalǵan adamnyń aıtýynsha, tuqymdar men jabdyqtardy ınternet-dúkennen satyp alǵan. Tárkilengen esirtki zattarynyń jalpy salmaǵy 400 gramnan astam boldy, sonymen qatar ustalǵan adam kannabıoıdtardy qoldanýdan týyndaǵan esirtkilik mas kúıde bolǵan. Sot oǵan 6 jyl merzimge bas bostandyǵynan aıyrý jazasyn taǵaıyndady.
