Esirtki zattaryna qatysty talapty oryndamaǵan 41 medıtsına qyzmetkeri jaýapqa tartyldy

ASTANA. QazAqparat – Іshki ister mınıstrliginiń ókili Aqtoty Boranova jaqynda ótken «Dármek» jedel-profılaktıkalyq is-sharasynyń nátıjesi týraly baıandady, dep habarlaıdy QazAqparat tilshisi.

Onyń barysynda dárihanalarda preparattardy satý jaǵdaılary da tekserildi. «Dármek» operatsııasy respýblıka aýmaǵyn tutas qamtı otyryp ótkizildi. Bul turǵyda medıtsınalyq mekemeler, dárihanalar, qoımalar, ónerkásiptik kásiporyndar jáne basqa da nysandar tekserildi.

«5 kúnde preparattar zańdy túrde ótkiziletin nysandarda esirtki, psıhotroptyq nemese ýly zattarǵa qatysty tıisti erejeni oryndamaýdyń 28 faktisi jáne 193 ákimshilik quqyq buzý deregi anyqtaldy», - dedi A. Boranova mınıstrliktiń baspasóz alańynda ótken brıfıngide.

Onyń aıtýynsha, osy tekseris barysynda ákimshilik jaýapkershilikke 193 adam tartyldy, onyń ishinde 41 medıtsına qyzmetkeri bar.

«Esirtki zattary bar 8,8 myń tabletka men 7,4 myń ampýla, psıhotroptyq zattary bar 28 myń tabletka jáne 8,2 myń ampýla tárkilendi. Zańdy tulǵalardyń qyzmetine qatysty júrgizilgen tekserýler nátıjesinde, lıtsenzııalyq normalar men tehnıkalyq talaptardyń buzylýyna baılanysty 3,2 myń tonnaǵa jýyq prekýrsor men 459 tonna ýly zattyń aınalymy shekteldi», - dedi vedomstvo ókili.