Esirtki tutynyp, kólikti qujatsyz júrgizgen SQO turǵyny ustaldy
PETROPAVL. QazAqparat - Petropavlda polıtseıler esirtki tutynyp, kólik tizgindegen azamatty, dep habarlaıdy QazAqparat tilshisi.
Polıtsııa departamenti baspasóz qyzmetiniń málimetinshe, 38 jastaǵy turǵynnyń esirtki qoldanyp, kólikti basqarýy birinshi ret emes. Ol buǵan deıin de tap osyndaı jazaǵa tartylǵan, sodan beri bir jyl da ótpegen. Bul joly ol 15 táýlikke qamaýǵa alynyp, kólikti 6 jylǵa júrgizý quqyǵynan aıyryldy.
«ZAZ-Shans» kóligin esirtkige masaıǵan kúıinde júrgizgen taǵy bir soltústikqazaqstandyq 30 táýlikke ákimshilik qamaýǵa alyndy. Medıtsınalyq tekserýden keıin onyń esirtki qoldanǵany belgili boldy. Málimetter bazasy júrgizýshiniń esirtki qoldanyp, kólik basqarýy birinshi ret emes ekendigin kórsetti. Onyń ústine ol da kólikti júrgizý quqyǵynan aıyrylǵan.
«Kólikti basqarǵan nashaqor adam óltire alady. Mundaı adamdardyń saparǵa shyǵýyna jol bermeý - tártip saqshylarynyń mańyzdy mindetteriniń biri. Aınalasyndaǵy adamdardyń ómiri men densaýlyǵyna qaýip tóndiretin júrgizýshilerge tıisti zańnamaǵa sáıkes qatań shara qoldanylady», - dep atap ótti jergilikti polıtsııa qyzmeti bastyǵynyń orynbasary Aıdyn Baımatov.
Byltyr soltústikqazaqstandyq polıtseıler esirtki tutynǵan 57 júrgizýshini ustady. Olardyń barlyǵy kólikti júrgizý quqyǵynan aıyryldy. Kólik quralyn basqarý quqyǵynan buǵan deıin aıyrylǵan eki azamatqa qatysty ákimshilik qamaý jazasy qoldanyldy.
Olesıa Jýkoven
