Esirtki saýdalaǵan krımınaldyq polıtsııa basqarmasynyń qyzmetkeri 10 jylǵa sottaldy
ASTANA. Qańtardyń 22-si. QazAqparat - Esirtki zatyn saýdalaǵan Batys Qazaqstan oblysy Іshki ister departamentiniń krımınaldyq polıtsııa basqarmasynyń qyzmetkeri 10 jylǵa bas bostandyǵynan aıyryldy,
dep habarlaıdy QazAqparat QR Bas prokýratýraǵa silteme jasap.
Vedomstvo baspasóz qyzmetiniń málimdeýinshe, qylmystyq isti tergeý barysynda zańnyń saqtalýyna júrgizilgen tekseristiń nátıjesinde, Batys Qazaqstan oblysy Oral qalasynyń prokýratýrasy oblystyq ІІD krımınaldyq polıtsııa basqarmasynyń burynǵy jedel ýákiliniń ústinen QR Qylmystyq kodekstiń 259-shy babynyń 3-shi bóligi «v,g» tarmaǵy boıynsha qozǵalǵan qylmystyq isti sotqa tapsyrǵan.
Máselen, ótken jylǵy maýsymnyń 19-y kúni BQO boıynsha Ulttyq qaýipsizdik komıtetiniń departamentine azamat «Ivanov» habarlasyp, ishine sur tústi untaq zat salynǵan polımerli oramasy bar sirińke qorabyn ákelip bergen. Azamat atalmysh zat «geroın» bolyp tabylatynyn jáne ony krımınaldyq polıtsııa basqarmasynyń qyzmetkeri 15000 teńgege zańsyz satqanyn aıtqan.
Baspasóz qyzmetiniń aıtýynsha, saraptama nátıjesi «Ivanovtyń» bergen zaty - salmaǵy 5,55 gramm geroın ekendigin rastaǵan.
2010 jyly qańtardyń 18-i kúni Oral qalalyq sotynyń úkimimen polıtsııa qyzmetkeri QR QK-niń 259-shy baby 3-shi bóligi «v,g» tarmaǵy boıynsha kináli dep tabylyp, múlkin tárkileýmen qatar, 10 jylǵa bas bostandyǵynan aıyrý jazasyna kesildi. Sottyń úkimi zańdy kúshine engennen keıin aıyptalýshy jazasyn qatań tártiptegi túzeý mekemesinde óteıtin bolady.
