Esirtki satýmen aınalysqan erli-zaıyptylar qolǵa tústi
ALMATY. QazAqparat - Almaty polıtsııasy esirtki satýmen aınalysyp kelgen erli-zaıyptylardy qolǵa túsirdi, dep habarlaıdy QazAqparat tilshisi.
Qalalyq ІІD esirtki bıznesimen kúres basqarmasynyń qyzmetkerleri Jambyl oblysyndaǵy áriptesterimen birige otyryp «Kanal - Krasnyı barhan» operatsııasy aıasynda Almatyǵa jetkiziletin esirtki kanalyn áshkereledi.
«Osyǵan baılanysty 46 jastaǵy er adamdy sotqa deıingi tergeý bastaldy. Er adam gashısh saýdalaýmen aınalysqan. Ol taýardy sirińke qorabynda bólshektep satqan. Polıtsııa onyń esirtkini qaıdan alatynyn anyqtady. Júrgizilgen tekserý barysynda 44 jastaǵy er adam ustaldy. Ol kórshiles Jambyl oblysynan esirtki jetkizýmen aınalysyp kelgen. Er adam taýardy alyp kelýge Jambylǵa ketkende, onyń ornyna 41 jastaǵy jubaıy esirtkini bólshektep, satyp otyrǵan. Bastapqyda ustalǵan er adam «senimdi satyp alýshylardyń» biri bolǵandyqtan, kelinshek úıinde eri joq kezde esirtkini oǵan satqan», - dedi qalalyq ІІD basqarma basshysyniń mindetin atqarýshy Nurlan Moshqalov.
Qazirgi tańda esirtki saýdasynyń kórigin qyzdyrǵandardyń barlyǵy qamaýda.
«Olardy tintý kezinde jalpy alǵanda 6 keli 209 gramm esirtki zaty tárkilendi. QR QK 297-baby boıynsha sotqa deıingi tergeý júrgizilip jatyr. Kinási dáleldengen jaǵdaıda olar 10-15 jylǵa bas bostandyǵynan aırylýy múmkin», - dedi Moshqalov.
