Esirtki satpaq bolǵan ekeý 11 jyldan arqalady - Qyzylorda
QYZYLORDA. QazAqparat - Qyzylorda oblystyq sotynda esirtki zattardy zańsyz saqtap, satý maqsatynda tasymaldaǵan eki sottalýshyǵa qatysty aıyptaý úkimi jarııalandy, dep habarlady QazAqparat tilshisi oblystyq sotqa silteme jasap.
Almaty oblysynyń týmasy N. avtokóligimen Almatydan Tarazǵa kele jatqan kezde jol boıynda ishinde esirtki zattary bar polıetılen qabyn kórgen. Qapty kóligine salyp alyp, Qyzylorda qalasyndaǵy K. degen tanysyna kelgen. Oǵan esirtki zattardy birge satyp, paıdasyn bólip alýǵa usynady. Tanysy K. usynyspen kelisip, ekeýi Aqtóbe qalasyna jolǵa shyqqan.
«Aral-Shet» baqylaý-ótkizý pýnktinde «Chandı» atty qyzmettik ıtpen avtokólikti tekserý kezinde, kóliktiń artqy oryndyǵynda sary tústi skotchpen oralǵan 19 dana paket, qaǵazǵa salynǵan jáne tússiz skotchpen oralǵan 6 dana paket tabyldy. Olardyń ishinde 487,34 gramm gashısh jáne 9220,54 gramm keptirilgen marıhýana salynǵany anyqtaldy.
Qyzylorda oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshylar N. jáne K. QR QK-niń 297-babynyń 3-bóliginiń 1,3 tarmaqtarymen kináli dep tanylyp, múlikteri tárkilenip, árqaısysy 11 jyldan bas bostandyǵynan aıyryldy. Jazalaryn qylmystyq atqarý júıesiniń qaýipsizdigi barynsha joǵary mekemelerinde óteý belgilendi.
Úkim zańdy kúshine engen joq.
