Esirtki satqan qaraǵandylyq 11 jylǵa bas bostandyǵynan aıyryldy

QARAǴANDY. QazAqparat – Bıyl Qaraǵandy oblysynda esirtki qylmysynyń sany ulǵaıǵan. Taldaý kórsetkendeı, áleýmettik jeliler men qolma-qol aqshasyz tólem júıeleriniń qarqyndy damýy qaskúnemderge jábirlenýshilermen tikeleı baılanyssyz túrli qylmys jasaýǵa múmkindik beredi, dep habarlaıdy QazAqparat tilshisi.

Oblysta ártúrli messendjerler arqyly betbelgilerdi ornalastyrý arqyly baılanyssyz jolmen esirtki satý keń taralǵan.

«Bıyl Qaraǵandy qalasynyń turǵyny 11 jylǵa bas bostandyǵynan aıyryldy, ol «Telegram« messendjerin paıdalanyp, qala boıynsha esirtki zattarymen betbelgilerdi salyp júrgen. Sonymen qatar aǵymdaǵy jyldyń naýryz aıynda sotqa oblystyń týmasyna qatysty qylmystyq is jiberildi, ol da «Telegram« arqyly «Alfa – PVP« preparatyn satqany anyqtaldy. Atalmysh qylmys úshin ustalǵandar 10 jyldan 15 jylǵa deıin múlkin tárkileýmen bas bostandyǵynan aıyrylýy múmkin», - dep habarlady Qaraǵandy oblysy prokýratýrasynyń baspasóz qyzmeti

Sondaı-aq, aımaq prokýrorlary osy sanattaǵy qylmystardyń negizgi bóligin (133 nemese 64%) esirtkini satý emes, olardy medıtsınalyq emes turǵyda tutyný, daıyndaý, óńdeý, satyp alý, saqtaý jáne ótkizý maqsatynsyz tasymaldaý (QR QK 296-baby) quraıtynyn atap ótti.

Osyǵan baılanysty Qaraǵandy oblysynyń prokýratýrasy ata-analarǵa óskeleń urpaqtyń minez-qulqyna, esirtkini qoldanýdyń negizgi belgilerine nazar aýdaryp, olardyń densaýlyǵyna zııan tıgizetinin esten shyǵarmaýǵa shaqyrady.

Quqyq qorǵaý qyzmetkerleri ata-analardan balalaryna nazar aýdarýdy suraıdy. Esirtkini qoldanýdyń negizgi belgileri mynaý:

- ol óz bólmesinde bir nárse jasyryp turǵandaı kúıde júredi;

- baıaý nemese tym jyldam sóıleý;

- aqsha men zattar úıden joǵalady;

- táttilerdi kóp jeıdi jáne kóp sý ishedi;

- ashýlanshaq, oqshaý júretin bolady;

- kózdiń erekshe jyltyrlyǵy;

- tis aýrýlary, qurǵaq teri;

- qolda, ishekte, aıaqta, qoltyqta ınektsııa izderi paıda bolady, tamyrdyń túsi kók túske enedi.

Esirtkini zańsyz paıdalanǵany, daıyndaǵany, saqtaǵany, ıemdengeni, tasymaldaǵany, satqany jáne jarnamalaǵany úshin ómir boıyna bas bostandyǵynan aıyrýǵa deıingi jazamen qylmystyq jaýapkershilik qarastyrylǵan.