Esirtki satqan elordalyq 15 jylǵa sottalýy múmkin

ASTANA. QazAqparat – Elordanyń 35 jastaǵy turǵyny 15 jyl bas bostandyǵynan aıyrý jazasyn arqalaıtyn bolady. Bul týraly ІІM ókili Shuǵyla Turlybek aıtty, dep habarlaıdy QazAqparat tilshisi.

«Esirtki qylmysyna qarsy is-qımyl basqarmasynyń qyzmetkerleri mefedron psıhotroptyq zatyn elordaǵa, elimizdiń basqa óńirlerine, onyń ishinde Aqmola oblysyna asa iri mólsherde jetkizýmen jáne satýmen aınalysqan Astana turǵynyna qatysty jedel aqparat aldy. Atalǵan derek boıynsha QR QK 297-baby, 3-bóligi, 5-tarmaǵymen sotqa deıingi is júrgizý bastaldy. Qoımashyny ustaǵan kezde jedel qyzmetkerler 30 paketti taýyp, tárkiledi. Olardyń árqaısysynda 10-nan 30-ǵa deıin oralǵan esirtki zaty boldy», - dedi Shuǵyla Turlybek mınıstrliktiń baspasóz qyzmeti alańynda ótken brıfıngte.

Onyń aıtýynsha, saraptama qorytyndysyna sáıkes, tárkilengen zat jalpy salmaǵy 843 gramm bolatyn mefedron psıhotroptyq zaty ekendigi anyqtaldy. 35 jastaǵy astanalyq esirtkini jasyryn orynǵa qoıyp úlgermen.

«Sondaı-aq esirtkimen kúres polıtseıleri kúdiktiniń uıaly telefonyn tárkiledi. Onda esirtki zattaryn satýǵa qatysty kýratormen hat almasý jáne jasyryn oryndarǵa qoıý arqyly esirtki zattaryn ótkizý týraly fotoesep bar. Kúdikti qamaýǵa alyndy. Polıtseıler qylmystyq is-árekettiń basqa qatysýshylaryn anyqtaý úshin jumys jalǵastyryp jatyr», - dedi vedomstvo ókili.