Esirtki mafııasymen baılanysqan polıtseı temir tordyń ar jaǵynan bir-aq shyqty
QOSTANAI. QazAqparat - Búgin Qostanaı qalasy №2 sotta krımınaldyq polıtsııa bóliminiń burynǵy qyzmetkeri Ámir Túlkenovke úkim shyqty, dep habarlady «QazAqparat» HAA tilshisi.
Túlkenov esirtki mafııasymen tyǵyz baılanysta bolǵany úshin jaýapkershilikke tartylyp, sottalǵan ishki ister organdaryndaǵy 17-shi qyzmetker. Bul is boıynsha sot Qostanaıda 2014 jyldan bastap júrip jatyr.
Sotta Túlkenovtiń 2012 jyly birneshe aı ishinde esirtki satýshylardyń aqshasyn, esirtkisin paıdalanǵany dáleldendi.
Sottalýshy aıyptaýdyń birde-bir tarmaǵyna daýlasqan joq. Ol jazasyn jeńildetedi degen úmitpen óz kinásin tolyqtaı moıyndady. Sot Túlkenovtiń jas balasy men júkti áıeli bolýyna baılanysty jumsartatyn mán-jaılardy eskerdi. Alaıda oǵan 4 jyl bas bostandyǵynan aıyrý jazasy kesildi. Sottalýshy jalpy rejimdegi kolonııada jazasyn óteıdi. Qosymsha jaza retinde sot oǵan quqyq qorǵaý organdarynda 6 jyl jumys isteýge tyıym saldy.
Úkim zańdy kúshine engen joq.
