Esirtki quraldarynyń zańdy aınalymy salasynda 44 medıtsınalyq qyzmetker jaýapkershilikke tartyldy
ASTANA. QazAqparat - Esirtki quraldary, psıhotroptyq zattar men prekýrsorlardyń aınalymy salasynda barlyǵy 71 quqyq buzýshylyq anyqtaldy. Bul týraly QR ІІM Esirtki bıznesine qarsy kúres departamentiniń málimetinde habarlandy.
Atap aıtqanda, departament 2016 jylǵy 23-27 mamyr aralyǵynda respýblıka aýmaǵynda esirtki quraldary, psıhotroptyq zattar men prekýrsorlardyń zańdy aınalymy salasynda quqyq buzýshylyqtardy anyqtaý jáne jolyn kesýge baǵyttalǵan «Dopıng» jedel-profılaktıkalyq is-sharanyń 2-kezeńin ótkizdi.
Operatsııaǵa barlyǵy 881 ishki ister organdarynyń qyzmetkerleri onyń ishinde 98 esirtki bıznesine qarsy kúres bólinisteriniń qyzmetkerleri qatysty. Іs-sharany ótkizý aralyǵynda esirtki quraldary, psıhotroptyq zattar men prekýrsorlardyń aınalymy salasynda qyzmetti júzege asyrýshy - 406 sýbekt, onyń ishinde 187 dárihana, 91 qoıma, 91 emdeý-profılaktıkalyq mekemeleri jáne 37 óndiristik kásiporyndar tekserildi.
«Zańsyz aınalymǵa 100 tabletkaǵa jýyq jáne 2500-den astam ampýla esirtki quraldary men psıhotroptyq zattardyń ótýine jol berilmedi, sondaı-aq 7 keli prekýrsor aınalymy shekteldi. Operatsııa barysynda esirtki quraldary, psıhotroptyq zattar men prekýrsorlardyń aınalymy salasynda barlyǵy 71 quqyq buzýshylyq anyqtaldy. Esirtki quraldarynyń zańdy aınalymy salasynda zańsyz áreketterdi jasaǵany úshin 44 medıtsınalyq qyzmetker jaýapkershilikke tartyldy»,-dep atap ótilgen vedomstvo málimetinde.
