Esirtki bıznesine qarsy kúreske 53 mlrd teńgeden astam qarjy bólindi

ASTANA. QazAqparat – QR ІІM esirtki qylmysyna qarsy is-qımyl departamentiniń erekshe tapsyrmalar jónindegi aǵa ınspektory Serik Sultanov Prezıdent qatysýymen ótken esirtki qylmysyna qarsy kúres týraly otyrys qorytyndysyn aıtty, dep habarlaıdy QazAqparat tilshisi.

«Qasym-Jomart Toqaev jaqynda Úkimet qabyldaǵan nashaqorlyq pen esirtki bıznesine qarsy keshendi jospardyń mańyzdylyǵyn atap ótti. Qaýipsizdik Keńesine qujattyń oryndalý barysyn baqylaýǵa alýdy tapsyrdy», - dedi Serik Sultanov aptalyq brıfıngte.

Keshendi jospardyń negizgi maqsaty – avıatehnıka men pılotsyz ushý apparattaryn qoldanyp, adam az júretin ýchaskelerde esirtkiniń qaýipti túrleriniń taralý kanaldaryna suranysty azaıtý jáne jolyn kesý, jasyryn esirtki zerthanalary men plantatsııalardy joıý boıynsha jalpyulttyq deńgeıde sharalar qabyldaý.

«Ásirese jastar men jasóspirimder arasynda esirtkige táýeldilikti erte anyqtaý, esirtki tutynýshylardyń naqty esebin jasaý kózdelgen. Sondaı-aq ýákiletti organdardy materıaldyq-tehnıkalyq jabdyqtaý jáne uıymdyq-quqyqtyq mártebesin arttyrý qaralǵan. Nashaqorlyqtyń aldyn alý júıesin jetildirýge, nashaqorlyqty emdeýge jáne esirtkige táýeldi adamdardy ońaltý júıesin damytýǵa, sondaı-aq vedomstvoaralyq ózara is-qımyldy kúsheıtýge de kóp kóńil bólinedi. Osy is-sharalardy iske asyrýǵa bıýdjetten 53,1 mlrd teńge bólý kózdelgen», - dep tolyqtyrdy Serik Sultanov.