Esirtki bıznesi: Transulttyq qylmystyq toptyń taǵy bir múshesi ustaldy

NUR-SULTAN. QazAqparat – QR Іshki ister mınıstrligi Kóliktegi polıtsııa departamentiniń qyzmetkerleri esirtki bıznesine qatysty transulttyq uıymdasqan qylmystyq toptyń taǵy bir arnasyn anyqtady. Aqtóbe qalasynda esirtkini óndirip, satýmen aınalysqan 30 jastaǵy jergilikti turǵyn ustaldy, dep habarlaıdy QazAqparat Polisia.kz saıtyna silteme jasap.

Polıtsııa qyzmetkerleriniń atalǵan arnaǵa qatysy bar kúdiktilerdi ustaý jumystary 2021 jyly bastalǵan bolatyn. Ol kezde Nur-Sultan qalasy, Qaraǵandy, Aqmola jáne Pavlodar oblystarynda birqatar adam qolǵa tústi. Satýǵa daıyn 25 keliden astam esirtki jáne olardy jasaýǵa arnalǵan 3,5 tonna prekýrsorlar tárkilendi. Bes iri esirtki zerthanasy joıyldy, olardyń ekeýi Qaraǵandy oblysynda, al Nur-Sultan qalasynda, Pavlodar, Aqmola oblystarynda osyndaı bir-bir zerthanadan jumys istegen. Arnaıy operatsııa barysynda transulttyq uıymdasqan qylmystyq top uıymdastyrýshysy men onyń 6 qatysýshysy ustaldy. Olar Mefedrondy Qazaqstanda jáne odan tys jerlerde jasap, ótkizýdi uıymdastyrǵan.

Qylmystyq toptyń árbir qatysýshysy ózine bekitilgen esirtki satý aýmaǵyna jaýapty bolǵan. Sondaı-aq zattardy tasymaldaý, daıyndaý jáne saqtaý sııaqty belgili bir mindetterdi atqarǵan. Máselen, tórt adam Nur-Sultan, Almaty, Pavlodar, Qaraǵandy qalalarynda psıhotroptyq zattardy daıyndaýmen jáne ótkizýmen aınalysqan. Olardyń biri óz qyzmetin Reseı men Grýzııa aýmaǵynda júzege asyrǵan.

Tergeý barysynda halyqaralyq qylmystyq baılanystar anyqtalyp, QR QK-niń 264-baby (Transulttyq qylmystyq topty qurý jáne oǵan basshylyq etý) boıynsha qylmystyq is qozǵaldy. Osy uıymdasqan qylmystyq top boıynsha esirtki bıznesine qatysty 8 qylmystyq is qozǵaldy.

Jańajyldyq merekeler qarsańynda Qaraǵandy qalasynda esirtki óndirý úshin prekýrsorlardy jiberýmen aınalysyp kelgen qylmystyq toptyń taǵy 1 qatysýshysy ustaldy. Jalǵa alynǵan garajda «Alfa-PVP» jasaý úshin qoldanylatyn hımııalyq zattar – prekýrsorlar quıylǵan alty 30 lıtrlik plastıkalyq bóshke tabyldy.

Kúdiktiniń baılanystaryn pysyqtaý barysynda úı jaǵdaıynda sıntetıkalyq esirtki óndirisin jolǵa qoıǵan Aqtóbe qalasynyń turǵyny anyqtaldy. Ustaý kezinde odan sıntetıkanyń esirtkiniń birrettik 5 dozasy, al turǵylyqty jeri boıynsha taǵy 8 túıinshek tárkilendi. Sonymen qatar qalanyń ár jerinde tapsyrys boıynsha «klıentter» úshin daıyndalyp, jasyrylǵan 55 túıinshek alyndy.

Sot-hımııalyq saraptama nátıjeleri boıynsha tárkilengen zat jalpy salmaǵy bir kelige jýyq esirtkini qurady. Esirtki óndirý faktisin rastaıtyn zattaı dáleldemeler tárkilendi.

Osylaısha, taǵy bir esirtki zerthanasy joıyldy. Esirtki qylmysyna qarsy is-qımyl departamentiniń bastyǵy Erlan Omarbekov túsindirgendeı, Іshki ister mınıstrligimen sıntetıkalyq esirtkiniń aınalymyna qarsy is-qımyldyń tıimdiligin arttyrý boıynsha maqsatty baǵyttalǵan birqatar is-shara júzege asyrylýda.