Esim tóreniń kesenesi jańǵyrtyldy

TALDYQORǴAN.QazAqparat -  Almaty oblysynyń  Alakól aýdanyndaǵy Jylandy aýylynda  Esim tóreniń kesenesi araǵa  100 jyl salyp qaıta jańǵyrdy.  Tozyǵy jetken mazardy  jańartýǵa muryndyq bolǵan belgili metsenat - Baýyrjan Ospanov. Keseneni qalpyna keltirý metsenattyń kópten  beri  oılap júrgen josparynyń biri bolǵan.  Júzege asýyna Elbasynyń  «Bolashaqqa baǵdar: rýhanı  jańǵyrý» maqalasy serpin bergen, dep habarlaıdy QazAqparat tilshisi. 

Esim tóre 19 ǵasyrdyń aıaǵy, 20 ǵasyrdyń basynda ómir súrgen. Lepsi óńirinde dáýletti bolys, qaıyrymdy, jomart azamat retinde el esinde qalǵan. «Alash orda» qozǵalysyn qarjylaı qoldap, qıyn-qystaý zamanda muqtaj jandarǵa malyn taratyp, halyqtyń bosyp ketpeýine úles qosqan. 

«Esim tóre alystan kelgen muqtaj jandardyń ózderine bir kúnniń ishinde 700 jylqydaı taratyp bergen. Qansha qıyn zaman bolsa da osy jerde qalyp, óz halqyna bolysyp, ómiri de osy jerde ótti. Osy jerde qaıtys boldy», - deıdi Esim tóreniń urpaǵy Temirbek Ahmetov.

Esim tóreniń jylqysynyń kóptigi sonshalyq, sý ishýge kelgende Shynjyly ózeni birer sátke aǵysyn toqtatqan desedi. 

«Biz arhıvtegi dúnıelerdi  jınap jatyrmyz. Endi ary qaraı kóp kitaptar, derekti fılmder shyǵady. Sonyń ishinde Esim tóreni, Muhamedjan Tynyshpaev týraly kóptegen estelikter jaıly estısizder dep oılaımyn», - deıdi metsenat. 

Týǵan jer salalyq baǵdarlamasy negizinde Esim tóre kesenesinen bólek  Alashtyń 100 jyldyǵyna oraı Muhamedjan Tynyshpaevtyń kitaby jaryqqa shyqpaq. Lepsi aýylynda meshit, Qabanbaı aýylynda sport kesheni salynyp jatyr.