Esildegi túngi serýen maýsymnyń ortasynda ashylady
ASTANA. QazAqparat - Aldaǵy kúnderi Esil ózeninde teplohodpen túngi serýenge shyǵý maýsymy bastalady. Astananyń aıshyqty jerlerin kemede otyryp, túngi 1:00-ge deıin tamashalaýǵa bolady, dep habarlaıdy elorda ákimdiginiń medıa ortalyǵy.
«Bıylǵy maýsymnyń ereksheligi - maýsym aıynyń ortasynda Esil ózeninde túngi serýendi uıymdastyrýdy kózdep otyrmyz. Bul tasymaldyń qosymsha qýaty men kólemin arttyrady. Sáıkesinshe, bizdiń kásiporynnyń qyzmetine kóp adam júgine alady», - dedi medıa ortalyqtyń tilshisine bergen suhbatynda «Esil Astana» MKQK dırektory Qanat Alın.
Sondaı-aq onyń aıtýynsha, Esildegi keme maýsymy 11 mamyrda bastalǵan. Qala turǵyndary men qonaqtaryna syıymdylyǵy ártúrli 6 jolaýshylar teplohody qyzmet etedi. Túngi tasymal kezindegi jaılylyq pen qaýipsizdik maqsatynda jolaýshylar kemelerinde jaryqtandyrý quraldarymen jabdyqtalǵan arnaıy navıgatsııalyq belgiler ornatylady. Bılet baǵasy ózgerissiz burynǵy qalpynda qaldy. Balalar úshin - 500, úlkender úshin 1 000 teńge. Jalpy, kemedegi serýen qyzmetin shamamen 20 myń jolaýshy paıdalanady.
«Jaqynda jańa teplohod satyp aldyq. Jańa tıegish katerge «Batyr» degen ataý berdik. Bul bizdiń keme parkimizdegi teplohodtardyń ishindegi eń myqtysy deýge bolady. Ol ótken jyly satyp alynǵan barjdy tirkep súıreýge múmkindik beredi. Ári ekologııalyq talaptardy saqtaı otyryp, Esil ózeni arnasyn tazartýǵa múmkindik beredi», - dedi Q.Alın.
