Esilde shomylý áli de qaýipsiz emes
ASTANA. QazAqparat - Esilde shomylý áli de qaýipsiz emes. Sebebi sý tereń tusy áli de sýyq, dep habarlaıdy Astana qalasy ákimdiginiń medıa ortalyǵy .
Astanada 1 maýsymnan bastap resmı túrde shomylý maýsymy ashyldy. Alaıda kúnniń ysyǵanyna qaramastan sýdyń tereńdigindegi temperatýra áli de demalýshylarǵa qaýipti bolýy múmkin.
Qutqarýshylar azamattarǵa sýda óte saq bolýǵa, alkogoldik ishimdik iship sýǵa shomylmaýǵa, tereń júzbeýge keńes beredi. Ózenniń tereń tusy áli de salqyn eken.
«Qazir sýdyń ústińgi temperatýrasy shomylýǵa saı keledi, biraq ystyq kúnder ýaqytynan kesh bastalǵandyqtan sý tolyq jylymady. Sol sebepti turǵyndarǵa sińirleri tartylyp qalmas úshin tereń súńgimeýge keńes berer edim», - dedi elordalyq ákimdiktiń medıa ortalyq tilshisine QR ІІM TJK ortalyq aımaqtyq aeromobıldi jedel-qutqarý otrıady jetekshisiniń orynbasary Beısenbaı Jeksenov.
Ol tek arnaıy quqtarý qyzmeti bar, tıisti jabdyqtarmen qamtamasyz etilgen oryndarmen ruqsat etilgen jerlerde shomylý kerektigin de aıtty.
Shomylý úshin eresek adamdarǵa sý temperatýrasy 20-22 gradýs, al aýa qysymy 25 gradýstan tómen bolmaýy kerek. Budan bólek, tońǵansha, ıaǵnı tisińiz tisińizge tıip dirildeı bastasańyz, tez arada sýdan shyǵý kerek. Eger júzý bilmeseńiz, tek belýardan kelgen jerge deıin ǵana baryńyz. Bastysy, balalardy úlkenderdiń qaraýynsyz sýdyń mańyna jalǵyz qaldyrýǵa bolmaıdy. Bul qaıǵyly oqıǵalarǵa ákelýi múmkin.
«Shomylý maýsymy resmı túrde ashylǵannan bergi 15 kúnde úsh adam sýǵa ketti. Kýágerlerdiń aıtýynsha, olardyń barlyǵy mas kúıinde shomylǵan», - dep eskertedi B.Jeksenov.
Onyń málimetinshe, jyl basynan beri Astana aýmaǵynda 7 adam sýǵa ketken. Onyń bireýi ata-anasy qaraýsyz qaldyryp ketken bala.
Qutqarýshylar elorda jaǵalaýyndaǵy sýlar shomylýǵa jaramdy dep sendiredi. Bul jerlerde únemi súńgýirler túbin tazalap turady. Turǵyndardyń súıikti ornyna aınalǵan qalalyq jaǵajaı bar.
Jaǵalaýlarda demalýshylardyń qaýipsizdigin qutqarýshylar qadaǵalaıdy. Barlyq jaǵajaılarda kúndelikti saǵat 8:00-den 22:00-ge deıin kezekshilik qoıylǵan.
«EKSPO-nyń ótýine baılanysty 1 maýsymnan 10 qyrkúıek aralyǵynda biz kúsheıtilgen jumys rejimine kóshtik. Barlyq sharalar qoldanylýda. Aqmola men Qaraǵandy oblystarynyń qutqarýshylary kómekke shaqyryldy», - dedi Beısenbaı Jeksenov.
