Esilde kemeler maýsymy bastaldy
ASTANA. QazAqparat - Aq buıra tolqyny jardy uryp, esip aqqan Esildiń jaǵasy erekshe sulý búgin. Samal jeldiń sybdyrymen áýelegen orkestr syńǵyry kelýshilerdi saltanatpen qarsy alyp jatty. Múlgigen tynyshtyqty seıiltken bul shara novıgatsııa maýsymynyń bastalǵanyn bildiredi, dep habarlaıdy elorda ákimdiginiń resmı saıty.
«Bıyl Germanııadan «Esil» atty sý jańa keme aldyrdyq. Onda tamaqtanýǵa da múmkindik jasalatyn bolady. Óte sapaly. Syıymdylyǵy 75 adam», - dep jańashyldyǵymen bólisti «Esil Astana» MKQK dırektory Qanat Alın. Qala turǵyndary ǵana emes, elorda qonaqtary da Esilge soqpaı ketpeıdi. Qalany aralap, ózinshe baǵalap qaıtady. Múgedek balalarǵa arnalǵan ınternat úıiniń tárbıelenýshileri men UOS ardagerleri kemeniń alǵashqy jolaýshylary boldy. Olar úshin tegin saıahat uıymdastyrylyp, syılyqtar úılestirildi. Jalpy, 2013 jylǵy novıgatsııa maýsymynda 24 myń adam tasymaldanǵan. Búgingi tańda Esil ózenindegi keme júzý baǵdarynyń uzyndyǵy 9 shaqyrym. Aldaǵy ýaqytta uzyndyǵyn Telman eldi mekenine deıin sozý josparda bar. Kásiporyn flotynda 8 keme qyzmet kórsetýge daıyn. Onyń ishinde syıymdylyǵy 69, 60, 32 jáne 45 adamdyq 5 jolaýshylar kemesi, sonymen qatar qutqarý katerleri men súıreýish kemeler bar. Al, bılet quny qalta kóterimdi. Ol 7 jastan asqan balalar úshin 400 teńge, eresekterge 800 teńge. Jalpy, bıyl motorly kemelerdiń Esil ózenine shyqqanyna 6 jyl. Novıgatsııa maýsymy qazan aıynyń ortasyna deıin jalǵasady.
