Esil jaǵalaýyndaǵy «Samal» shaǵyn aýdany qalaı salyndy
«Astana Bas jospary» ǵylymı-zertteý jobalaý ınstıtýtynyń málimetine súıensek, «Samal» shaǵyn aýdanyn túbegeıli josparlaý jobasyn 1996 jyly jergilikti «Aq Orda» sáýlet fırmasy ázirledi. Úılerdiń eki túriniń kólemdik sheshimin jumys jobasyn ázirlegen túrik fırmasynyń ókilderi usynǵan bolatyn. Bul yqsham aýdan úıleriniń aldyńǵy bólikterinde ashyq tústerdi qoldanýmen Esil ózeni jaǵalaýyndaǵy qurylystardyń qaıtalanbas beınesi kórsetilgen. Atalǵan úılerdiń qurylysy 1997 jyly bastaldy, olar Almatydan kóship kelgen memlekettik qyzmetshilerdiń otbasylaryna tabys etildi.
Keıinirek Memleket basshysy Nursultan Nazarbaev «Eýrazııa júreginde» atty tanymal kitabynda «Samal» shaǵyn aýdanynyń qurylysyna egjeı-tegjeıli toqtalyp ótedi.
«Keletin memlekettik qyzmetshiler men olardyń otbasylary úshin turǵyn shaǵyn aýdan salýǵa zor kóńil bólindi. Mundaı alǵashqy shaǵyn aýdandy salýǵa arnalǵan oryn tańdaý boıynsha usynys kóp boldy. Bolashaq qurylys úshin qazir «Samal» shaǵyn aýdany ornalasqan jer meılinshe qolaıly dep tabyldy. Degenmen naq osy aýdanda qurylys salýǵa qarsylar az bolmady. Batpaq, qamys, ǵımarat ózenge qulap ketedi desti. Biraq ákim men Astana sáýletshileri óz degenderinde turdy. Men olardy qoldadym, osy ýchaskeni qurylys salýǵa bóldik. Sóıtip, jańa elorda kartasynda Astananyń eń bir kórikti, kelbetti turǵyn shaǵyn aýdany salyndy. Oǵan «Samal» degen ádemi de aıshyqty at berildi. Keıin Ádilbek Jaqsybekov qazirgi «Samal» aýmaǵyna qurylys salýǵa qarsy bolǵandardyń shyn sebebin aıtyp berdi. Bul ara Aqmolanyń barlyq úlken dárejeli sheneýniginiń ıt qydyrtatyn jeri bolyp kelgen eken. Sóıtip, osyndaı yńǵaıly jerden aıyrylǵylary kelmepti. It, árıne, adamnyń dosy. Biraq, degenmen, adamnyń problemasy tórt aıaqty haıýannyń problemasynan mańyzdyraq qoı», - dep eske aldy Elbasy óz kitabynda.
Sonymen qatar osy kitapta Memleket basshysy «Samal» shaǵyn aýdanynda ornalasqan quny 33 mıllıonǵa jýyq dollar turatyn «Astana Tower» bıznes ortalyǵyn Túrkııanyń AVS ortalyǵy qarjylandyrǵanyn atap ótken.
Naqtyraq aıtqanda, búginde «Astana Taýer Ishletme» kompanııasy Astana qalasyndaǵy «A» sanatty eń iri jáne zamanaýı Bıznes ortalyqtarynyń biri - «Astana Tower» Bıznes ortalyǵynyń ıesi bolyp tabylady. «Astana Tower» Bıznes ortalyǵy elshilikterdiń, halyqaralyq uıymdardyń, bankter, munaı, gaz jáne qurylys kompanııalarynyń keńselerin ornalastyrýǵa arnalǵan qolaıly oryn. Keshenniń jalpy aýdany 22 632 sharshy metr.
«Astana Tower» álemdik standarttarǵa sáıkes tehnologııalarmen salynyp, zamanaýı úlgide turǵyzylǵan ǵımarat. Qalada bıik eńseli boı kótergen jáne ǵajaıyp kórinisterdi pash etetin 21 qabatty keńse ǵımaraty jáne úlken 2 qabatty saýda ortalyǵynda «Ramstor» gıpermarketi jáne «Esil» fıtnes ortalyǵy ornalasqan. Budan basqa keshende: fýd-kort «Aqbozat», meıramhana, Gloria Jean's Coffees kofeınıasy, sulýlyq salony, áýekassa, áýetýragenttik, notarıýs, aqsha aıyrbastaý pýnkti jáne bank bar. Osylaısha, ol kún saıyn qala turǵyndary men qonaqtaryna kóptep keletin nysandardyń biri bolyp otyr.
