Esil ózeniniń ústinen jaıaý kópir salynady
NUR-SULTAN. QazAqparat – Elorda ákimi Altaı Kólginov Instagram paraqshasynda qaladaǵy qoǵamdyq seıil qurý oryndaryn qalaı keńeıtetinin aıtty, - dep habarlaıdy QazAqparat.
«Qala turǵyndarynyń ótinishterin oryndaý úshin qoǵamdyq keńistikterdiń (skverler, saıabaqtar, býlvarlar) qajet ekendigin eskere otyryp, bıyl olardy keńeıtý boıynsha aýqymdy jumystar júrgizip kelemiz. Máselen, B.Momyshuly dańǵyly boıymen jaǵalaýǵa deıin jaıaý júrginshiler jelekjolyn abattandyramyz. Tolqyn tárizdi alleıa aýmaǵynda ústel tennısi men shahmatqa arnalǵan ústelder, demalýǵa jáne átkenshek tebýge arnalǵan kóleńkeli aımaqtar ornatýdy josparlap otyrmyz», - dep jazdy ákim.
Shahar basshysynyń aıtýynsha, bul Trıatlon parkin jańa bórtegúl baǵymen biriktirip, eko-marshrýt qurýǵa múmkindik beredi.
«Byltyr Trıatlon saıabaǵyn aýqymdy abattandyrýdy bastadyq. Ótken jyly qalada alǵash ret kópir alańdary abattandyryldy. Saraıshyq kóshesindegi kópirdiń astynda sportpen aınalysýǵa arnalǵan birneshe aımaq ashyldy, saıabaq aýmaǵynda fýtbol alańdary ornatyldy. Bul kópir - Trıatlon men Prezıdent saıabaǵy arasyndaǵy kópir, ol bıyl óz jalǵasyn tabady», - deıdi Altaı Kólginov.
Astana ákimi Esildiń ústinen velosıpedshiler men jaıaý júrginshilerge arnalǵan kópir salýdy josparlap otyrǵanyn da atap ótti.
«Bul kópir eki saıabaqty – Tuńǵysh Prezıdent saıabaǵy men Esil ózeniniń boıyndaǵy saıabaqty biryńǵaı klastermen biriktirýge múmkindik beredi. Osylaısha qala turǵyndary aýdandar arasynda kedergisiz júre alady. Kópirdiń boıynda demalys aımaqtaryn jabdyqtaımyz, al kópirdiń ishine átkenshek ornatamyz», - dep jazdy elorda ákimi.
Sondaı-aq, ol shahardaǵy abattandyrý jumystary Prezıdent Qasym-Jomart Toqaevtyń tapsyrmasy boıynsha iske asyp jatqanyn eske salady.
«Bıylǵy kógaldandyrý jumystarynyń ereksheligi aýlalyq aýmaqtardan, saıabaqtardan, skverlerden, býlvarlardan, eldi mekenderden basqa, kórikti jerlerimizdiń irgeles aýmaqtaryn kógaldandyrýǵa kiriskenimizde. Bul «beton oryndar» sanyn azaıtady. Mysaly, «Astana Opera» aýmaǵynda emen baǵy, Trıatlon saıabaǵynda bórtegúl baǵy, Q.Qýanyshbaev atyndaǵy Qazaq mýzykalyq-drama teatry men «Astana Balet» aýmaǵynda jasyl baq paıda bolmaq», - dep túıindedi qala basshysy.
