Esil ózenindegi tańǵajaıyp shoýdy 35 myń kórermen tamashalaıdy dep kútilýde
ASTANA. QazAqparat - Astananyń 17 jyldyǵyna oraı shildeniń 4-5 kúnderi Esil ózeniniń jaǵasynda tuńǵysh ret «Nurly Esil» mýltımedııalyq-pırotehnıkalyq tańǵajaıyp shoý uıymdastyrylady.
Bul qazirgi zamanǵy lazerlik jáne pırotehnıkalyq tehnologııalardy sý betinde oınatatyn aıryqsha kórinis bolmaq, dep habarlaıdy astana.kz.
Esil ózeniniń ústindegi jalpy aýdany 1000 tekshe metrlik sahnadaǵy sımfonııalyq orkestr shoý áserin arttyra túsedi. Olar qazaqtyń halyq ánderi men zamanaýı klassıkalyq áýenderdi oryndaıdy.
Sahnanyń aınalasynda bıiktigi 12 metrdi quraıtyn sýburqaqtar jasalyp, jańa lazerlik tehnologııalardyń kómegimen jarqyn beınerolıkter kórsetiledi.
Bul kórinistiń sońy estradalyq-sımfonııalyq orkestrdiń súıemeldeýimen kózdiń jaýyn alar pırotehnıkalyq shoýǵa ulasady.
Montajdaý jumystarynyń barlyǵy shildeniń 1 deıin aıaqtalady dep kútilýde.
- Shara tolyqtaı sahna ústinde ótedi. Shoý 40 mınýtqa jalǵasyp, sońǵy 10 mınýtta pırotehnıkalyq shoý mýzykamen birge astasady. Qazirgi kezde óńdeý jumystary júrgizilip jatyr, 1 km qashyqtyqta «Falkon» dep atalatyn óte qýatty zenıtti jaryq qurylǵylary ornatylady, - deıdi «Nurly Esil» shoýynyń prodıýseri Málik Hasenov.
Mýzykalyq súıemeldeý avtory - tanymal kompozıtor Renat Gaısın.
Astana qalasy Mádenıet basqarmasynyń basshysy Bolat Majaǵulovtyń aıtýynsha, kórermenderge arnalǵan LED ekrandar ornatylmaq.
- Bir ýaqytta bul shoýdy 35 myńǵa jýyq kórermen tamashalaı alady. Lazerlik shoý men sýburqaqtardy, sahnadaǵy kórinisti qashyqta turǵan halyq arnaıy ekrannan kóredi, - dedi B. Majaǵulov. Aıta keteıik, «Nurly Esil» mýltımedııalyq-pırotehnıkalyq tańǵajaıyp shoýy 4-5 shilde kúnderi saǵat 22.30-da bastalady.
