Esil ózenindegi sýdyń sapasy tekserildi
NUR-SULTAN. QazAqparat - Dúnıejúzilik sýdy monıtorıngileý jáne taldaý kúnine oraı Ekologııa, geologııa jáne tabıǵı resýrstar mınıstrligi Esil ózenindegi sýdan synama alý protsesin kórsetti, dep habarlaıdy QazAqparat tilshisi.
«Qorshaǵan ortanyń lastanýyn synaý zerthanasy Esil ózeninen sý synamasyn aldy. Synama alý kezinde temperatýra ólshenedi, sodan keıin synama zerthanaǵa jetkizilip, organıkalyq quramy, aýyr metaldardyń bolýy, tuzdyń quramy zertteledi», - dedi «Qazgıdromet» RMK qorshaǵan ortanyń lastanýynyń monıtorıngi synaq zerthanasynyń basshysy Erbol Orazalın.
Onyń aıtýynsha, sýdyń sapasyn osylaı baqylaý jumysy aı saıyn júrgiziledi.
«Nur-Sultanda biz baqylaıtyn jeti sý qoımasy jáne synama alatyn 20 oryn bar. Bizdiń sý aıdyndary eń taza sý aıdyny emes ekenin moıyndaýymyz kerek, biraq ruqsat etilgen shekti kontsentratsııa mólsherden asyp ketpeıtinin de aıta ketken jón. Biz birneshe jyldan beri Esil ózenine monıtorıng júrgizip kelemiz jáne sý quramynda aıtarlyqtaı ózgerister bolǵan joq «, - deıdi ol.
Erbol Orazalın sý quramy ne sebepti aıtarlyqtaı ózgermegeni týraly da málim etti.
«Bizde sýdy qatty lastaıtyn iri zaýyttar men kásiporyndar joq. Eger sý quramyndaǵy keıbir kórsetkishter qalyptan asyp ketse, onda biz aqparatty Tótenshe jaǵdaılar departamentine, Nur-Sultan ákimdiginiń Ekologııa departamentine jiberemiz. Olar sý quramyn qalypqa keltirý josparyn ázirlep, problemalyq núkteni taýyp, taldaý júrgizedi. Biraq men taǵy da qaıtalaımyn, Esil ózeninde shamadan tys kórsetkish bolyp kórgen joq», - deıdi ol.
Mekemeniń baspasóz qyzmeti habarlaǵandaı, «Qazgıdromet» RMK elimizdiń 143 sý obektisinde ornalasqan 424 núktesinde, onyń ishinde 93 ózende, 31 kólde, 15 sý qoımasynda, 3 arna jáne 1 teńizde sýdyń sapalyq jaı-kúıine baqylaý júrgizedi.
