Esil ózenindegi muz ústinen balyqshylardyń 5 shatyry alynyp tastaldy
ASTANA. QazAqparat - Astanada qutqarýshylar muzy tolyq qatpaǵan Esil ústinde júrgen balyqshylarǵa eskertý jasady, dep habarlaıdy QazAqparat Elorda ınfoǵa silteme jasap.
Astanalyq qutqarýshylar qala turǵyndaryn Esil ózeniniń tolyqtaı qatyp úlgermegen muzdyń qaýip-qaterinen saqtaý maqsatynda arnaıy reıd uıymdastyrdy. Sebebi, keıbir jergilikti turǵyndar, ıaǵnı balyq aýlaýshylar juqa muz ústine shatyrlaryn tigip, balyq aýlaýǵa kirisip ketken. Reıd barysynda 26 balyqshy men 12 azamatqa túsindirý jumystary júrgizildi.
Sharany TJD jáne jergilikti polıtsııa qyzmetkerleri jáne qutqarýshylarmen birlesip ótkizdi.
«Qazirgi tańda qaladaǵy balyqshylar «Radisson» qonaq úı aımaǵynda muz ústine shatyrlardy kóptep tigedi. Keı ýchaskelerde balyqshylar sany jıyrmaǵa deıin jetedi, olar keı jerlerde muzdy 7 jerden tesken. Qutqarýshylar balyqshylar muz astyna túsip ketý qaýpi bar ekendigine alańdaýly. Munymen qosa, balyqshylarda qutqarý jeletteri joq», - delingen qalalyq Tótenshe jaǵdaılar departamenti baspasóz qyzmetiniń habarlamasynda.
Departamenttiń baspasóz qyzmetiniń málimetinshe, qaýipti oryndardan 5 shatyr alynyp tastalǵan.
