Esil ózenindegi qaýipsizdikti qamtamasyz etý máseleleri talqylandy
ASTANA. Shildeniń 28-i. QazAqparat - Búgin Qazaqstan Respýblıkasynyń Kólik jáne kommýnıkatsııa mınıstrliginde Esil ózenindegi keme qatynasynyń qaýipsizdigi máselelerine qatysty keńes bolyp ótti. Onyń jumysyna «Astana qalalyq jolaýshylar kóligi jáne kólik joldary basqarmasy» MM, «Esil-Astana» MQKK, «Keme qatynasy tirkelimi» MM, Astana qalalyq tótenshe jaǵdaılar jónindegi departamentiniń sý-qutqarý stansasy, «Saryarqa» kólik baqylaýy aımaqaralyq ınspektsııasy bólimshesiniń ókilderi, keme ıeleri men qaıyqty jalǵa berý stansalarynyń qojaıyndary qatysty.
Keńes barysynda serýendik jáne shaǵyn sý kólikteriniń paıdalaný qaýipsizdigin qamtamasyz etý, sonymen qatar Esil ózenindegi qaıyqtardy jalǵa berý stansalarynyń qyzmeti talqylandy.
Keńes barysynda sóz alǵan Kólik baqylaýy komıtetiniń tóraǵasy Erlan Jumashev atap ótkendeı, Esil ózenindegi sý kólikterin paıdalanýdyń qaýipsizdigin qamtamasyz etý máseleleri birlesken jáne kelisilgen is-áreketti talap etedi. Bul jerde tek Kólik baqylaýy komıtetiniń ınspektsııasy úshin ǵana emes, ol másele jergilikti atqarýshy organdar, sý-qutqarý qyzmeti, keme ıeleri men olardy jalǵa berýmen aınalysatyn tulǵalar úshin de mańyzdy bolýy kerek.
Keńes barysynda atap ótilgendeı, Esil ózenindegi kóńil kóterýge arnalǵan kemeler kóp jaǵdaıda apatty sátter týǵyzyp, jıi adam ólimine soqtyrýda.
Osyǵan oraı, Kólik baqylaýy komıteti Esil ózenindegi shaǵyn jáne kóńil kóterý kemeleriniń qatynasyna shekteý qoıý týraly usynys aıtty. Shekteý tek memlekettik organdardyń qyzmettik-júrginshi kemeleri men sý-qutqarý qyzmetiniń kemelerine ǵana júrmeıdi.
Osy máseleniń kókeıkestiligine oraı, Astana qalasynyń ákimdigine Shaǵyn kemelerdi paıdalaný jáne olardyń turaqtary týraly jergilikti qoldaný erejesin daıyndaý týraly tapsyrma berildi. Ol erejede Astana sheńberindegi Esil ózenindegi shaǵyn sý quraldaryn paıdalanýdyń qaýipsizdik máseleleri kórinis tabýy tıis.
