Esil ózeninde sýdyń arnadan asyp ketý qaýpi joq – elordalyq TJ departamenti
NUR-SULTAN. QazAqparat – Nur-Sultan qalalyq tótenshe jaǵdaılar departamentiniń bastyǵy Baýyrjan Syzdyqov Esil ózeninde ózen saǵasyn keńeıtý jumystary júrgizilip jatqanyn málim etti, dep habarlaıdy QazAqparat tilshisi.
«Esil ózeniniń saǵasyn keńeıtý jumystary atqarylýy tıis. Ol jumystar júrgizilip jatyr. Kóktem bitip, jaz kelgende de ol jumys toqtamaıdy. Sý tasqynyna deıin ózen saǵasy 100 metrge deıin keńeıtildi», - dedi Baýyrjan Syzdyqov elorda ákimdiginiń baspasóz ortalyǵyndaǵy onlaın rejımdegi baspasóz máslıhatynda.
Onyń aıtýynsha qazir Esil ózeninde sýdyń arnasynan asatyndaı qaýip joq.
«Sebebi bizge gıdrologııalyq boljam ár apta saıyn beriledi. Máselen 4 sáýirdegi boljamǵa qaraıtyn bolsaq, Astana sý qoımasyna 160 mln jáne 240 mln tekshe metr arasynda sýdyń keletini boljanǵan. Al 6 sáýirden bastap búginge deıin 83 mln tekshe metr sý keldi. Astana sý qoımasynyń jobalyq syıymdylyǵy 410 mln tekshe metr bolsa, qazir qoıma 309 mln tekshe metrge tolyp tur. Demek onda áli de sý qabyldaý qaýqary barshylyq. ıAǵnı sýdyń kelgen kólemin qabyldap, ózendegi sý deńgeıiniń kóterilýine jol bermeýge múmkindigimiz bar», - dedi ol.
