Esil ózeninde sý deńgeıi kóterildi: Jaǵdaı baqylaýda
PETROPAVL. QazAqparat - Petropavlda Esil ózeni tasyp jatyr. Saldarynan Chelıabi-Novosibir baǵytyndaǵy respýblıkalyq mańyzy bar joldy sý shaıdy. Qazir tótenshe jaǵdaı departamentiniń mamandary jaǵdaıdy baqylaýda ustap otyr, dep habarlaıdy QazAqparat tilshisi.
«Qazgıdromet» RMM SQOF málimetinshe, Toqsan bı aýylynyń janynda Esil ózeniniń sý deńgeıi bir táýlikte 85 sm kóterildi. Petropavlda bul kórsetkish 12 sm artqan. Novonıkolskoe eldimekeniniń mańynda kópir sý astynda qalyp, Pokrovka, Nıkolaevka jáne Órnek aýyldarynyń mańynda sý arnasynan shyqty. Petropavl qalasynda Chelıabi-Novosibir baǵytyndaǵy avtojoldyń 528 shaqyrymyn sý shaıyp ketti.
«Aqmola oblysynan taǵy sý kele jatyr. Sergeev sý qoımasynda sý tasqynynyń ekinshi kezeńi bastaldy. Qazir mundaǵy sý deńgeıi 880 sm, sýdyń mólsheri 790 mln tekshe metr. Bul - qajetti mólsherden shamamen 100 mln tekshe metrge artyq. Sýdyń jıekten asyp aǵýy 80 sm-ge jetti. Táýligine 379 tekshe metr sekýndyna sý jiberilip jatyr», - deıdi «Qazgıdromet» RMM SQOF dırektory Qymbat Merǵalımova.
SQO Tótenshe jaǵdaılar departamenti mamandarynyń aıtýynsha, búginde Petropavldaǵy sý toraby tolǵan. Mundaǵy sý deńgeıi qazir 843 sm, bir táýlikte 12 sm kóterildi. Jaıylǵan sý Zarechnyı kentindegi saıajaı ýchaskelerine kire bastady.
Qutqarýshylar ázirshe alańdaýǵa negiz joq dep otyr. Jaǵdaı baqylaýda.
«Sý saıajaı ýchaskelerine kirgenimen úılerdi basqan joq. Qazir ol aımaqta táýlik boıy tártip saqshylary kezekshilik etýde. Respýblıkalyq mańyzy bar joldy sý shaısa, aınalma jol bar. Baılanys úzilgen joq. Biz daıyn boldyq. Búgin «Elegııa», «Elektron» saıajaı qoǵamdaryn aralap, jaǵdaıdy bilemiz», - deıdi SQO TJD bastyǵy Ramıl Kamalov.
Oblys ortalyǵynyń Zarechnyı kentine jaqyn avtojoldar ýchaskelerinde qaýipsizdikti qamtamasyz etý boıynsha jumystar júrgizilýde. Avtokólikterdiń júrýine shekteý engizilýine baılanysty, osy eldimekenge jaqyn jerde post qoıylǵan. Departament qyzmetkerleri joǵary ótimdi avtokólikpen táýlik boıy kezekshilik atqarýda.
Sondaı-aq, Tótenshe jaǵdaılar departamentiniń jáne jergilikti atqarýshy organdardyń qyzmetkerleri arasynan sý tasqynyna turaqty monıtorıng júrgizý maqsatynda Esil ózeniniń boıynda ornalasqan eldi mekenderdiń: Qyzyljar aýdanynyń Báıterek, Teplıchnoe, Sokolovka, Dolmatovo aýyldarynyń, Petropavl qalasy Teri zaýytynyń aýdany mańynda baqylaý beketteri qoıyldy. «Sý tasqyny kezinde tótenshe jaǵdaıdyń aldyn alý jáne joıý maqsatynda departamenttiń Daǵdarys ortalyǵynda táýlik boıy jedel shtab jumys isteıdi. Jaǵdaı turaqty baqylaýda», - deıdi qutqarýshylar.
