Esil ózeninde konkımen syrǵanaýdan buqaralyq jarys ótti
ASTANA. QazAqparat - Jeksenbi kúni Astanada konkımen úlken qashyqtyqqa júgirýden Red Bull Ice Baiga buqaralyq jarysy ótti, dep habarlaıdy QazAqparat elorda ákimdiginiń saıtyna silteme jasap.
Dene shynyqtyrý, sport jáne salaýatty ómir saltyn damytý men ony nasıhattaý "Astana Konvenshn Bıýronyń" uıymdastyrýymen ótken sharanyń basty maqsaty bolyp tabylady. Esil ózeni aıdynynda ótken Red Bull Ice Baiga jarysyna 120-dan astam qala turǵyny men qonaqtary qatysty.
«Er azamattar men áıelder uzyndyǵy 500 metr bolatyn trekti eki márte baǵyndyrdy. Aıazdy aýa raıyna qaramastan qatysýshylarmen birge kelgen jankúıerler jaqsy qoldaý kórsete bildi. Jarysty kóterińki kóńil-kúı bıledi», - deıdi uıymdastyrýshylar.
Úshinshi oryn ıegeri 20 000 teńgelik, ekinshi oryn júldegeri 30 000 teńgelik jáne birinshi oryn ıegeri 50 000 teńgelik sertıfıkattarmen marapattaldy. Sondaı-aq jeńimpazdardyń barlyǵyna kýboktar tabys etildi.
Aıta keteıik, Red Bull Ice Baiga jarysy Astanada aldaǵy ýaqytta jyl saıyn uıymdastyrylady dep josparlanýda.
