Esil ózeninde kememen júzý maýsymy ashyldy
ASTANA. QazAqparat - Búgin Astanada qala ákimdiginiń qoldaýymen Esil ózeniniń keme júretin ýchaskesinde onynshy maýsymnyń saltanatty ashylýy ótti, dep habarlaıdy elorda ákimdiginiń resmı saıty.
Kemeniń alǵashqy jolaýshylary dástúrli túrde «Nurly júrek» áleýmettik qyzmet kórsetý ortalyǵynyń tárbıelenýshileri boldy. Resmı bólimnen keıin múmkindigi shekteýli balalar teplohodpen tegin qydyryp keldi.
«Esil-Astana» MKQK dırektory Qanat Alınniń aıtýynsha, bıyl alty jolaýshy kemesi tasymaldaıtyn bolady.
«Dástúrli navıgatsııa kezinde astana turǵyndary men qonaqtary sý kóliginiń qyzmetin paıdalana alady. 2009 jyly bizde bar bolǵany 5 keme bolsa, búginde olardyń sany 14-ke jetti, onyń 6 kemesi jolaýshylarǵa qyzmet etedi. Olardyń jalpy syıymdylyǵy 265 oryndy quraıdy», - dedi ol.
Aıta keteıik, Amfıteatr aýdanyndaǵy jaıaý júrginshiler kópirin salý boıynsha júrgizilip jatqan qurylys-montaj jumystaryna baılanysty, Astana ákimdigi ýaqytsha qozǵalys syzbasyn bekitti: otyrǵyzý Kenesary eskertkishinen tómende ornalasqan rotondadan - sý retteıtin plotına - Amfıteatr - Kenesary eskertkishinen tómen ornalasqan rotondaǵa ózgertildi.
Marshrýttyń uzaqtyǵy 3 km, al ýaqyty 25-30 mınýt. Ózende saıahattaýdyń ekskýrsııalyq-qydyrý qyzmetiniń baǵasy eresekter úshin - 500 teńge, balalar úshin - 250 teńge.
Kópir qurylysy jóndelgennen keıin «Astana-Esil» qaıtadan burynǵy bekitilgen marshrýt boıynsha Kenesary eskertkishinen Aqordaǵa deıin qashyqtyǵy 18,8 km jolaýshylar tasymaldaıdy. Úlkenderge - 1000 teńge, balalarǵa - 500 teńge.
Esil ózenindegi navıgatsııa maýsymy 31 qazanǵa deıin jalǵasady.
