Esil ózeninde bıyl keme maýsymy keshiktiriledi
ASTANA. QazAqparat - Astanada Esil ózeni arqyly ótetin jaıaý júrginshilerge arnalǵan jańa kópirdiń qurylysyna baılanysty qaladaǵy jazǵy keme maýsymynyń ashylýy keshiktirilýi múmkin, dep habardaıdy QazAqparat Elorda ınfoǵa silteme jasap.
«Esil Astana» MKQK sáýir aıynyń sońynda tehnıkany ózenge túsirip, mamyr aıynda ózendegi navıgatsııa maýsymyn ashady. Alaıda bıyl Astanadaǵy keme maýsymy jumysyn bastamaýy múmkin. Bastalsa da, birneshe aıǵa keshiktirilýi yqtımal.
«Esil Astana» MKQK dırektory Qanat Alınnyń aıtýynsha, kásiporyn aldaǵy ýaqytta tehnıkany sýǵa jiberýdi josparlap otyr.
«Jyl saıyn sáýir aıynyń sońynda sýda júzetin tehnıkany ózenge túsiremiz. Josparǵa sáıkes tehnıkany sýǵa túsirgen soń navıgatsııa maýsymynyń ashylýyna daıyndyqty bastaımyz. Bıyl 20 sáýirden keıin kemelerdi ózenge shyǵaramyz dep josparlap otyrmyz jáne kásiporyn mamyr aıynda ózendegi jolaýshylar tasymalyn qamtamasyz etýge daıyn. Alaıda, keme maýsymynyń ashylýyna qatysty eshteńe aıta almaımyz. Sebebi, qazir Esil ózeni arqyly ótetin jaıaý júrginshilerge arnalǵan jańa kópirdiń qurylysy júrgizilip jatyr. Navıgatsııa maýsymynyń ashylýy qurylys jumystarynyń aıaqtalýyna baılanysty. Joba boıynsha kópirdi tapsyrý ýaqyty - shilde aıy» , - dedi Elorda Info tilshisine «Esil Astana» MKQK dırektory Qanat Alın.
Aıta keteıik, 2018 jyly teplohodta qatynaý baǵasy ótken jyldaǵydaı ózgerissiz: úlkenderge 1 myń teńge jáne balalarǵa 500 teńge kóleminde bolady. Ózende serýendeý ýaqyty da 40 mınýt bolyp saqtalady. Alaıda jaıaý júrginshilerge arnalǵan kópirdiń qurylysyna baılanysty kemeler ázirge baǵdar boıynsha qatynaı almaıdy.
Búgingi kúni «Bı aı grýpp» kompanııasy ózenniń ortasyna jasandy damba salyp, qurylys jumystary qarqyndy júrgizilip jatyr.
