Esil ózeni jaǵasynan joǵalǵan er adamnyń denesi sýdan tabyldy
PETROPAVL. QazAqparat – Petropavlda Esil ózeniniń jaǵasynan joǵalǵan 44 jastaǵy er adamnyń denesin qutqarýshylar sýdan alyp shyqty, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, 20 shilde kúni saǵat 12.00-de jedel izdestirý otrıady - 5 qutqarýshy bir tehnıka jáne bir júzý quralymen izdeý operatsııasyn bastady. Bir saǵat shamasynda 1976 jyly týǵan er adamnyń denesi tabylyp, sýdan shyǵaryldy. Mamandardyń aıtýynsha, er adamnyń ústinde syrtqy kıimi bolǵan.
Petropavlda 44 jastaǵy er adam belgisiz jaǵdaıda Esil ózeniniń jaǵasynan joǵalǵan edi. Aldymen ony polıtseıler men volonterler izdep, keıin izdeý sharalaryna qutqarýshylar qosyldy.
Marqumnyń denesi sot-medıtsınalyq saraptamaǵa jiberildi, istiń-mán jaıy anyqtalyp jatyr.
