Esil boıymen balalardy serýendetken kemede elektrondyq qaldyqtardyń tabıǵatqa zııany týraly áńgimelendi
ASTANA. QazAqparat - 1 maýsym - Balalardy qorǵaý kúni aıasynda QR Úkimeti, BUUDB jáne Samsung Electronics Central Eurasia kompanııasynyń «Elektrondyq qaldyqtardy basqarý» birlesken jobasy balalar men olardyń ata-analaryna arnalǵan ekologııalyq-aǵartý aktsııasyn - Esil ózeni boıymen ádetten tys serýen uıymdastyrdy.
«Sharanyń basty maqsaty - elektrondyq qaldyqtardyń zııany men buzylyp, jaramsyz bolǵan ne paıdalanylmaıtyn uıaly telefondar, batareıalar, zarıadtaıtyn qurylǵylardy, eskirgen usaq elektronıkany ekologııalyq qaýipsiz túrde kádege jaratýdyń qajettiligi jaıly halyqtyń habardarlyǵyn arttyrý», - dep atap ótti BUU DB «Elektrondyq qaldyqtardy basqarý» jobasynyń úılestirýshisi Saltanat Baıeshova.
Onyń pikiri boıynsha, mektep qabyrǵasynan bastap-aq óskeleń urpaq boıynda ekologııashyl ári qorshaǵan ortamen uqypty da jaýapkershilikke toly qarym-qatynas jasaýdyń qajettigin tolyq túısinetin sana-sezim qalyptastyra berý mańyzdy bolyp sanalady.
Sharanyń basty sharty kelýshi kez kelgen usaq elektronıka zatyn kemege otyrar jerde ekoqorapqa (elektrondyq qaldyqtardy jınaýǵa arnalǵan arnaıy konteıner) salyp, kemege «bılet» alady.
Sýmen serýen jasaý barysynda balalarǵa túsinikti oıyn túrinde elektrondyq qaldyqtardyń zııany men (olardyń quramyndaǵy qaýipti zattar órteý men topyraqqa ári jer asty sýlaryna túsýi arqyly qorshaǵan orta men adam densaýlyǵyna orny tolmas zııan keltiretindigi sebebinen) olardy jurtqa ortaq qoqys tógetin jerlerge tastaýǵa bolmaıtyny týraly áńgimelendi.
«Joba Qazaqstan Respýblıkasynyń jasyl ekonomıkaǵa kóshýi tujyrymdamasyn júzege asyrýǵa járdem berýge baǵyttalǵan. Qazaqstandaǵy elektrondyq qaldyqtardy utymdy basqarýǵa qol jetkizýdiń kókeıkesti máselelerin kóteredi», - dep atap ótti S. Baıeshova.
