Esil aýdanynyń ákimdiginde jasy ulǵaıǵandar men múgedekterge úıde kómek kórsetetin arnaıy bólim ashyldy
ASTANA. 29. qańtar. QazAqparat - Esil aýdany ákimdiginiń apparatynda múgedekter men múgedek balalarǵa jáne qarııalarǵa úıde kómek kórsetetin arnaıy qyzmet bólimi ashyldy. Bul týraly astana.kz saıtyna Esil aýdanynyń ákimdiginen málim etti.
«Qazirgi kezde bólimde meńgerýshi men konsýltant jumys isteıdi. Sondaı-aq, qyzmetkerlerdi qyzmetke alý jáne qyzmet kórsetetin adamdardy anyqtap, olardy esepke alý úshin Astana qalasynyń Jumyspen qamtý jáne áleýmettik baǵdarlamalar basqarmasyna joldaý jumystary júrýde», - delingen habarlamada.
Úıde arnaıy qyzmet ózdiginen júrip-tura almaıtyn jalǵyz basty múgedekter men zeınetkerlerge, sondaı-aq, 1,5-nan 18 jasqa deıingi múgedek balalarǵa kórsetiledi.
Atalǵan sanatqa jatatyn azamattarǵa: áleýmettik-turmystyq, áleýmettik-mádenı, áleýmettik-ekonomıkalyq, áleýmettik-pedagogıkalyq, áleýmettik-psıhologııalyq, áleýmettik-quqyqtyq jáne áleýmettik-medıtsınalyq kómekter kórsetiledi. Ol úshin áleýmettik qyzmet kórsetý jónindegi mamandar jasy ulǵaıǵandar men múgedekterdiń (árqaısyna aptasyna 3 saǵattan) úılerine barady.
Aýdandyq ákimdikten habarlaǵanyndaı, bólim jumysynyń maqsaty men mindetteri múgedek balalardy ońtaılandyrý men áleýmettik beıimdeý, sondaı-aq, qarııalar men múgedekterge jasy ulǵaıǵan shaqta barynsha kómektesý bolyp tabylady.
