Esikti qulyptap alǵan: SQO-da kelinshek sábıleriniń áreketinen úıge kire almaǵan
PETROPAVL. QazAqparat – Petropavlda qutqarýshylar bir kúnde páter esigin ashyp berýge qatysty eki shaqyrtýǵa bardy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, «112» qutqarý qyzmetiniń telefonyna Petropavldaǵy kópqabatty úıdiń páter esigin ashýǵa kómektesýdi suraǵan habarlama túsedi. Telefonnyń ar jaǵyndaǵy adam baspanada áıeldiń barlyǵyn, biraq onyń kópke deıin esik ashpaı jatqanyn aıtqan.
Oqıǵa ornyna dereý «SQO TJD Órt sóndirý jáne avarııalyq-qutqarý jumystary qyzmeti» MM jedel-qutqarý jasaǵynyń qutqarý bólimshesi jiberildi. Qutqarýshylar kireberis esikti shants quralynyń kómegimen ashty. Úıde 1977 jyly týǵan áıel bolǵan. Syrqattanyp qalǵan turǵynǵa jedel járdem qyzmeti birden medıtsınalyq kómek kórsetti.
Dál sol kúni bir saǵat óter-ótpesten eki sábıdiń abaısyzda páterdi ishten qulyptap, anasynyń úıge kire almaı turǵany jaıynda habarlama túsedi.
Balalardyń anasy birneshe mınýtqa úıdiń astyńǵy qabatynda ornalasqan dúkenge shyǵyp ketken. Úıde qalǵan 2 jáne 3 jastaǵy eki sábı esikti qulypqa jaýyp alǵan. Esikti ózdiginen asha almaǵan áıelge qutqarýshylar kómekke kelip, ana balalarymen aman-esen qaýyshty.
