Esik urlaǵan óskemendik vıdeoǵa túsip qalǵan
ÓSKEMEN. QazAqparat - Óskemende podez esikterin urlaýdy kásip etken kúdikti ustaldy. Dánikken jigit kezekti «oljasyn» tapa-tal túste arqalap bara jatqan jerinen baqylaý kamerasyna túsip qalǵan, dep habarlaıdy QazAqparat tilshisi.
«Óskemen qalasynyń ishki ister basqarmasyna qarasty Ertis bóliminiń krımınaldy polıtsııa qyzmetkerleri kópqabatty úılerdiń podez esikterin urlap kelgen 24 jastaǵy jigitti qolǵa túsirdi» - delingen oblystyq ishki ister departamentiniń baspasóz qyzmeti taratqan aqparatta.
24-26 qańtar kúnderi Óskemenniń Qazaqstan jáne Myzy kóshelerindegi kópqatbatty úılerden tórt birdeı metall esik urlanǵan bolatyn. Kúdiktiniń esikti urlaǵan áreketteri kóshedegi beınebaqylaý kameralaryna túsip qalǵan. Sol vıdeonyń kómegimen kúdiktiniń izine túsken saqshylar aqyry ony qolǵa túsirdi. Ol esikterdi metall retinde ótkizip otyrǵan. Polıtsııa qyzmetkerleri esiktiń bárin ornyna qaıtardy.
Oqıǵa tergelip jatyr.
