Esik qalasyndaǵy zorlaýǵa qatysty iste polıtseıler nemquraıdylyq tanytty dep aıyptalýda
TALDYQORǴAN. QazAqparat - Esik qalasyndaǵy qyz zorlaý isi boıynsha polıtsııa qyzmetkerleri «nemquraıdylyq» jasady dep aıyptalýda. Bul týraly QazAqparat tilshisine bergen suhbatynda Jibek Mýsınovanyń qorǵaýshysy Aıman Ýmarova jetkizdi.
«Memlekettik aıyptaýshy prokýrorlar jábirlenýshini zorlaǵandardy 11 jylǵa bas bostandyǵynan aıyrýdy surady. Jibektiń ózi qylmyskerlerge qansha jyl berilse de olardyń keltirgen zııanynyń orny tolmaıtynyn, shyǵyny ótelmeıtinin aıtyp otyr. Ol áli kúnge deıin óz-ózine tolyq kele almaı júr», - dedi advokat Aıman Ýmarova.
Onyń aıtýynsha, osy oqıǵa boıynsha polıtsııa qyzmetkerlerine de «qyzmetine nemquraılylyqpen qarady» degen bap boıynsha is qozǵalǵan. «Meniń bilýimshe, polıtsııa qyzmetkerlerine qatysty isti ishki qaýipsizdik bólimi qarap jatyr deıdi. Alaıda, oǵan bizdi shaqyrǵan joq. Bizdiń ashýymyzdy keltiretin taǵy bir másele sol kúni Jibekti polıtsııa bólimshesine alyp kelgende, onda bir de bir tergeýshi bolmaǵan. Tek taǵylymdamashy (stajer) ǵana bolǵan. Janahmet Erdos degen taǵylymdamashy óziniń dál sol jaǵdaıda shoshyp ketkenin, ne isterin bilmegenin alǵa tartady. Sondyqtan da, is basynan bastap durys hattalmaǵan. Degenmen, osy qylmystyq oqıǵany jınaqtap qaraǵanda, olardyń zorlyq jasaǵany, qylmysqa barǵany bári anyq kórinip otyr», - deıdi A. Ýmarova.
Eske sala keteıik, qoǵamnyń úlken rezonansyn týdyrǵan sot otyrysy boıynsha Eńbekshiqazaq aýdanynyń sotynda talqylaý júrgen bolatyn. Jabyq rejimde ótken sot protsesi boıynsha tórt adam: Ashat Bektursyn, Eltaı Nurbol, Almas jáne Erbol Ermekovter isi qaralýda. Osyǵan baılanysty memlekettik aıyptaýshy Esik qalasynyń turǵyny Jibek Mýsınovany zorlaǵan degen tórt aıyptalýshyny 11 jylǵa bas bostandyǵynan aıyrýdy surap otyr. Sottyń sońǵy sheshimi qarasha aıynyń 15-ine shyǵady dep josparlanyp otyr.
Jibek Mýsınovany zorlaǵan degen kúdikpen tórt azamat birneshe bap boıynsha aıyptalyp otyr. QR QK-niń 125-babynyń 2-bóliginiń 1-tarmaǵymen, QR QK-niń 120-babynyń 2-bóliginiń 1-tarmaǵymen, QR QK-niń 121-babynyń 2-bóliginiń 1-tarmaǵymen, QR QK-niń 293-babynyń 2-bóliginiń 1-tarmaǵymen A.J.Bektursyn, N.T.Eltaı, QR QK-niń 125-babynyń 2-bóliginiń 1-tarmaǵymen, 120-babynyń 2-bóliginiń 1-tarmaǵymen, QR QK-niń 121-babynyń 2-bóliginiń 1-tarmaǵymen A.A. Ermekov, E.N.Ermekovke qatysty qylmystyq is 4 qazan kúni sotqa tústi. Aıta keteıik, buǵan deıin Jibek Mýsınovanyń anasy áleýmettik jeli arqyly qyzyn birneshe adam zorlap ketkendigi jóninde habarlap, halyqtan arasha túsýin suraǵan edi. Qoǵamnyń úlken talqysyna túsken qylmystyq isti oblystyq ІІD óz baqylaýyna alǵan bolatyn.
