Esik qalasynda perzenthana mańynan adam súıekteri shyǵyp jatyr
TALDYQORǴAN.QazAqparat – Almaty oblysynyń Eńbekshiqazaq aýdanynda adamnyń súıekteri tabyldy, dep habarlaıdy QazAqparat tilshisi.
Bul oqıǵa jaıly vıdeo áleýmettik jelige tarady.
Beınejazba avtory Esik qalasyndaǵy perzenthana mańynan adamnyń súıekteri tabylǵanyn aıtady.
Vıdeodan adamnyń bas súıegin kórýge bolady.
«Bálkim bul jerde qorǵan bolǵan shyǵar» dep pikir bildiredi vıdeo avtory.
Eńbekshiqazaq aýdany ákiminiń baspasóz qyzmeti QazAqparat tilshisine oqıǵanyń mán-jaıyn túsindirdi.
«Súıekter Esik qalasynyń janynda ornalasqan Bólek aýyldyq okrýginen tabyldy. Bul jer «Romashka» dep atalatyn saıajaı. Ol súıekter ashyq-shashyq shashylyp jatqan joq. Jerdi qazý barysynda shyqqan. Dál osy jerde sý qubyryn júrgizý jumysy júrgizilip jatyr. Súıekti tapqan da - sol mekemeniń jumysshylary. Qazir «Altyn adam» murajaıynyń arheologtary oqıǵa ornyna keldi. Súıekterdi jınap, saraptamaǵa jiberedi» dep málim etti atalǵan vedomstvonyń baspasóz qyzmeti.
