Esik qalasynda qyz zorlaýǵa qatysty is boıynsha sottalǵandar Joǵarǵy Sotqa aryzdanbaq
TALDYQORǴAN. QazAqparat - Búgin Taldyqorǵan qalasynda Jibek Mýsınovanyń jəne osy is boıynsha sottalǵandardyń apellıatsııalyq shaǵymdary qaralyp, oblystyq sot buǵan deıingi úkimdi ózgerissiz qaldyrǵan bolatyn. Bundaı úkimge Jibek Mýsınovanyń qorǵaýshysy qanaǵattanǵanymen, sottalýshylar endi jazany jeńildetý úshin joǵarǵy ınstantsııaǵa shaǵymdanbaq, dep habarlaıdy QazAqparat tilshisi.
Aıta keterligi, 2016 jyldyń 28 qarashasy kúni Jibek Mýsınovany zorlady degen aıyppen 4 azamatqa sot úkimi shyqqan bolatyn. Atap aıtqanda, Almas Ermekovti (1987 jyly týǵan) - 9,6 jylǵa, Erbol Ermekovti (1994 jyly týǵan)- 8 jylǵa, Eltaı Nurboldy (1992 jyly týǵan) - 9 jylǵa jáne Ashat Bektursyndy (1994 jyly týǵan) 10 jylǵa bas bostandyqtarynan aıyrý jáne jazany jalpy rejimdegi kolonııada óteý týraly qaýly etildi.
Al búgin Almaty oblystyq sotynyń Qylmystyq ister jónindegi sot alqasynda eki jaqtan da túsken apellıatsııalyq shaǵymdar qaraldy. Atap aıtqanda, sottalýshylar ózderine taǵylǵan aıyppen kelispeı, jazany jeńildetýdi surap apellıatsııalyq shaǵym jasasa, óz kezeginde jábirlenýshi - Jibek Mýsınovanyń tarapy da taǵaıyndalǵan jazaǵa qanaǵattanbaı, jazany kúsheıtý týraly apellıatsııaǵa bergen edi. Eki taraptyń apellıatsııalyq shaǵymdaryn qarastyrǵan Almaty oblystyq sotynyń Qylmystyq ister jónindegi sot alqasy 2016 jylǵy 28 qarashadaǵy úkimdi ózgerissiz qaldyrdy.
Aıyptalýshy tarap endigi kezekte, apellıatsııalyq shaǵymdy QR Joǵarǵy Sotyna joldamaq. «Sot úkimi ádil emes. Ol (Mýsınova - red.) tańerteń ózin urdy dep aryzdanǵan. Al keshkisin ol ózin zorlady dep shaǵymdanady. Basynda urdy, keshkisin zorlady deıdi. Sol aralyqta úıimizge kelip anasy men aǵasy aqsha surady. Árbir jigit 10 myń dollardan jáne Almastyń kóligin, úıin berińder dedi. Biz aqsha bermegendikten jazyqsyz balalar osylaı sottalyp ketip barady», - deıdi sottalǵandardyń týysy Dıana Amantaeva.
Al Jibek Mýsınovanyń qorǵaýshysy Aıman Ýmarova úkimniń ózgerissiz qalǵanyna qanaǵattanatynyn bildiredi. «Biz rızamyz osy sot úkimimen. Rasynda, jazalaryn qatańdatý úshin biz apellıatsııalyq shaǵym jazǵan bolatynbyz. Degenmen, bizdiń jáne sottalýshylardyń shaǵymy qanaǵattandyrýsyz qaldy», - dedi A. Ýmarova.
