Esik qalasynda balabaqshadaǵy búldirshindi urǵan jattyqtyrýshy jumystan shyqty
Oqıǵa Almaty oblysynyń Eńbekshiqazaq aýdany Esik qalasynda ornalasqan «Aıjan» bóbekjaı balabaqshasynda bolǵan.
«26 mamyrda Eńbekshiqazaq aýdany Esik qalasyndaǵy «Aıjan» bóbekjaı balabaqshasynyń «Jalyn» tobyndaǵy tárbıelenýshiniń ata-anasynan karate nusqaýshysy balasyn julqylap, urdy degen aýyzsha shaǵym tústi. Jaǵdaı arnaıy beınebaqylaý kamerasy arqyly dáleldendi. Balabaqshanyń sport zalynda turǵan beınebaqylaý vıdeosyn qaraǵanda karate nusqaýshysy jattyǵý barysynda balalardy qolymen nuqyp, aıaǵymen túrtip, julqylaǵany anyqtaldy»,- delingen Almaty oblysy ákimdigi baspasóz qyzmetiniń habarlamasynda.
Jaǵdaıǵa baılanysty balabaqsha qyzmetkerleriniń qatysýymen jıyn ótti.
Karate nusqaýshysynan túsinikteme alynyp, pedagogıkalyq etıka normalary men laýazymdyq nusqaýlyǵynda kórsetilgen mindetterdi oryndamaǵany úshin «qatań sógis» berildi.
Sonymen qatar, ol óz ótinishi boıynsha jumystan bosatyldy.
Vedomstvonyń aqparatyna sáıkes, búgingi kúni balabaqshanyń «Jalyn» tobynyń tárbıelenýshileriniń ata-analary Eńbekshiqazaq aýdandyq polıtsııa basqarmasyna shaǵym túsirgen.
Tergeý amaldary júrip jatyr.