Esik qalasynda 12 ǵasyr burynǵy jebeli qylshan tanystyryldy
Mádenıet jáne sport mınıstrliginen habarlanǵandaı, jebeli qylshannyń tanystyrylymy Halyqaralyq eskertkishter men tarıhı oryndardy qorǵaý kúnine arnalǵan merekelik is-shara aıasynda tanystyrylyp otyr. Tarıhı jádigerdi elimizge belgili restavrator Qyrym Altynbekov tanystyrdy. 
«Elbasynyń «Uly dalanyń jeti qyry» maqalasynda aıtylǵandaı, dala órkenıetiniń zor qýaty men estetıkasyn áıgileıtin tarıhı jádigerlerdiń mańyzyn keıingi urpaqqa amanattaý maqsatynda osyndaı úlken is-sharany uıymdastyryp otyrmyz. Bul qylshan - «Ǵylym Ordasy» RMK arheologııa mýzeıiniń (2010 jylǵa deıin - QR Ǵylym akademııasynyń Á.H.Marǵulan atyndaǵy arheologııa ınstıtýtynyń arheologııa mýzeıi) qorynan tabylǵan. 2010 jyly «Esik» qoryq-mýzeıine tapsyrylǵan. Tapsyrý kezinde buıym usaq bólshektelgen kúıinde berilgendikten (105 dana), Altyn adam qabirinen tabylǵan jaıpaq aǵash tabaq retinde kórsetilip, qatelikter oryn alǵan. Al qoryq-mýzeı qyzmetkerleri bul jınaqta qaıyń qabyǵynan jasalǵan materıaldardyń joq ekenin anyqtaǵan soń 2015 jyly restavrator Qyrym Altynbekovke kórsetken bolatynbyz. Restavrator bul buıymnyń qaıyń qabyǵynan jasalǵan qylshan ekenin anyqtap, qaıta qalpyna keltirdi», - deıdi memlekettik tarıhı-mádenı qoryq-mýzeı dırektory Tasqyn Toıbaev.
Óz kezeginde restavrator Qyrym Altynbekov osyndaı jádigerlerdi barynsha saqtaýǵa kúsh salyp kele jatqan mýzeı qyzmetkerlerine alǵys bildirdi.
«Bul jádiger qolymyzǵa tıgen kezde eshkimge túsiniksiz bólek-bólek zattar bolatyn. Onyń ishinde qaıyń qabyǵy, aǵash, qola, teri, jibek mata boldy. Munyń bári - mańyzdy zattar. Árbir jádiger - aqparat tasýshy. Biz sol tarıhı jádigerdi zertteı otyryp, tarıhty jazamyz. Osynyń bárin neshe jyl boıy ǵylymı zerttep, qurastyryp shyqqanda, minekeı, osyndaı Qımaq ýaqytyndaǵy qylshan shyqty. Bul - Jetisý boıynda kóp kezdese bermeıtin jádiger», - deıdi Qyrym Altynbekov.
Qylshannyń tusaýkeserimen qatar mýzeıde «Uly dalanyń uly merekesi - Naýryz» atalyp ótti. Mereke aıasynda týrızm jáne BAQ salasyndaǵy áriptesterge mýzeı isine qosqan úlesi úshin arnaıy marapat tapsyryldy. Іs-sharaǵa QR Mádenıet jáne sport mınıstrliginiń ókilderi, mýzeı basshylary, elimizge belgili arheologtar men ǵalymdar qatysty.
