Eshkimge aıyp taqqym kelmeıdi – Uldana Myrzýannyń anasy
ASTANA. KAZINFORM — Qyzmettik mindetin atqarý kezinde qaza tapqan feldsher Uldana Myrzýannyń anasy Sálıma Omarova sot kýlýarynda tilshilerge suhbat berdi jáne óziniń talap-aryzyn aıtty.
— Meniń talabym ádildik ornasa deımin. Sot sheshimi boıynsha eshkimge jaza nemese aıyp taqqym da kelmeıdi. Tek zań aıasynda sheshilsin, — dedi dedi S. Omarova sot kýlýarynda tilshilerge bergen suhbatynda.
Buǵan deıin marqum felsherdiń kúıeýi Ádilet Zeınel sot otyrysynda jábirlenýshi bolýdan bas tartatyny habarlanǵan edi.
U. Myrzýannyń týystary munyń durys bolǵanyn, moraldik quqyǵy joq ekenin aıtýda.
— Kúıeýbalamen sóılespedim. Ol basynda maǵan basynan aıaǵyna deıin jetkizýge ýáde bergen, amanatqa qııanat jasamaımyn degen. Adamgershilik qasıetten qııanat jasaıdy dep oılamadym. Ana retinde men oǵan qatty sengen edim, senimdi aqtamady. Sondyqtan jábirlenýshi bolýdan bas tart dep aıttym. Ol aldymyzǵa kelgen joq. Búgingi sotqa tanymaıtyn bóten adamdar sııaqty kirdi, amandasqan joq, — dedi S. Omarova.
Aıta keteıik, byltyr kúzde elordadaǵy turǵyn úıde kirpish qaptamasy qulap, mert bolǵan Uldana Myrzýanǵa qatysty is sotta qaralyp jatyr. Onda Páter ıeleri kooperatıviniń tóraǵasy aıyptalýshy retinde jaýapqa tartylǵan.
23 jasar Uldana Myrzýan 2025 jylǵy 18 qarashada qyzmettik mindetin atqarý kezinde kóz jumdy.
8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.
Memleket basshysy qaza tapqan feldsherdi «Erligi úshin» medalimen marapattady.
