Eshkimdi evakýatsııalamaımyz — QR SІM Los-Andjelestegi otandastarǵa saq bolýdy eskertti

ASTANA. KAZINFORM – QR Syrtqy ister mınıstrliginiń resmı ókili Los-Andjelestegi QR azamattaryn evakýatsııalaý qajettigi joǵyn aıtty.

— Los-Andjelestegi jaǵdaıǵa keletin bolsaq, ol jerde eshqandaı áskerı qaqtyǵys bolyp jatqan joq. Áýejaılar shtattyq rejımde jumys istep tur. Onda ne úshin bireýdi evakýatsııalaýymyz kerek? Bizdiń azamattarymyzdan eshqandaı ótinish túsken joq, — dedi Aıbek Smadııarov.

Resmı ókil AQSh-ta ınternet, telearnalar turaqty jumys istep turǵanyn, árkim ózine kerek aqparatqa erkin qol jetkize alatynyn atap ótti. 

— Árkim qaı jerde ne bolyp jatqanyn ǵalamtordan bile alady. Biz ár adamǵa «búıt-súıt» dep otyratyn kútýshisi emespiz ǵoı. Los-Andjeleske bara jatqan adam qaıda baratynyn, ol jaqta jaǵdaı qalaı ekenin bir qarap alýy kerek. Óz qaýipsizdigi qalaı qamtamasyz etiletinin eskerýi tıis, - dedi ol. 

Eske salaıyq, 6 maýsymnyń keshinde Kalıfornııa shtatynyń ońtústigindegi Los-Andjeles qalasynda ımmıgratsııalyq qyzmet (ICE) júrgizgen keń kólemdi reıdterden soń jappaı narazylyq bastaldy. Bul reıdter AQSh prezıdenti Donald Tramptyń zańsyz ımmıgratsııamen kúres naýqany aıasynda ótkizilip jatyr.

Senbi kúni qalada latynamerıkalyq turǵyndar kóp turatyn aýdandarda turǵyndar men Federaldy ımmıgratsııalyq jáne kedendik baqylaý qyzmeti (ICE) agentteri arasynda qaqtyǵys boldy. ICE kóz jasaýratatyn gaz jáne rezeńke taıaqshalar qoldanǵan. 

8 maýsym kúni Tramp Los-Andjeleske Ulttyq gvardııa kúshterin jiberdi. 

Sońǵy málimetterge sáıkes, qala ortalyǵynda 56 adam ustalǵan.