Eshkimniń esigin buzyp kire almaımyz - TJK tóraǵasy úıdegi peshti tekserý jaıly
ASTANA. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker jeke sektordaǵy turǵyn úılerdiń peshterin tekserý barysynda tótenshe jaǵdaılar qyzmetiniń mamandary qandaı qıyndyqqa kezdesetinin aıtyp berdi, dep habarlaıdy QazAqparat tilshisi.
Eske sala ketsek, buǵan deıin Vladımır Bekker turǵyn úı sektorlarynda júrgizilip jatqan órttiń aldyn alý jumystary týraly aıtyp bergen bolatyn. Onyń keltirgen málimetine sáıkes, osyǵan deıin 31 myń otbasy úıdegi peshti teksertýden bas tartqan.
«Joǵaryda atap ótkenimdeı, 31 myńdaı otbasy úıdegi peshti teksertýden bas tartqan bolatyn. Atap aıtqanda, Shymkentte 4 522 otbasy, Almaty oblysynda 9 874 otbasy, ShQO-da 3 400 otbasy, Jambyl oblysynda 2 073 otbasy, Qaraǵandy oblysynda 4 041 otbasy qyzmetkerlerimizdi úıine kirgizbegen. Men óńirlerdegi departament bastyqtarynyń bárimen sóılestim. Shyntýaıtyna kelgende, azamattardyń úıdi teksertýden bas tartý sebebin ózim de bilgim keledi. Meniń oıymsha, qandaı sebepter aıtylady. Ieleri úıinde bolyp shyǵady. Bolmasa ıesi belgili bir nysanyn bireýge jalǵa berýi múmkin... Bul úrdistiń bári de zańdy túrde júrgizile bermeıdi», - deıdi Vladımır Bekker.
Komıtet tóraǵasynyń aıtýyna qaraǵanda, kásipkerlikpen aınalysqysy kelgen azamat tirkelip, patent alyp, zańdy jumys júrgizýi kerek.
«Men departament bastyqtaryna úıdi teksertpeý sebepterin anyqtaý jumysyn tereńirek júrgizýdi tapsyrdym. Álbette, jergilikti atqarýshy organdar men jergilikti polıtsııa qyzmetkerleri bizge bul rette kómektesip jatyr. Ózińiz biletindeı, turǵyn úı - jeke múlik. Sondyqtan, jaǵdaıdy ýshyqtyrǵymyz kelmeıdi. Eshkimniń esigin buzyp kirip, teksere almaımyz. Sol sebepti, eń aldymen, úılerdi teksermek bolǵanymyzdy jáne olardyń bas tartqanyn tirkep jatyrmyz», - deıdi Vladımır Bekker.
