Eshkimge qoıar talabym joq – «Atyraý–Astrahan» poıyzynda qaıtys bolǵan balanyń anasy
Atyraýdan Reseıdegi lagerge poıyzben bara jatqan 13 jasar bala kóz jumǵan edi. Anasy Tamara Tsaplınanyń aıtýynsha, balasy burynnan syrqat bolǵan.
Onyń málimdemesin áleýmettik jeli qoldanýshysy Sandýǵash Kýkenova óziniń paraqshasyna júktedi.
«Men poıyzda qaıtys bolǵan Svıatoslav Tsaplınniń anasymyn. Adamdar onyń tamaqtan ýlanýdan kóz jumǵanyn aıtyp jatyr. Olaı emes. Onyń bala kúninen syrqaty bar edi. Árıne, mundaı jaǵdaı árkimniń basynda bolýy múmkin. Atyraý oblysynyń, Atyraý qalasynyń ákimderi qarjylaı kómek berdi. Avtobýs bóldi. Moraldyq qoldaýy úshin alǵysymdy aıtamyn. Kómek bergen, qoldaý kórsetken adamdardyń bárine rızashylyǵymdy bildiremin. Eshkimge eshqandaı talabym joq», -deıdi Tamara Tsaplına.
Eske sala ketelik, budan buryn Atyraýdan lagerge bara jatqan bala poıyzda qaıtys bolǵany habarlanǵan edi.
«Qazaqstan temir joly» UK baspasóz qyzmeti 7 tamyzda Atyraý oblysy aýmaǵynda «Atyraý-Astrahan» poıyzynda bolǵan oqıǵany rastady.
«7 tamyz kúni №625 «Atyraý-Astrahan» poıyzynda 2010 jylǵy bala qaıtys boldy. Ol bir top qatarlastarymen jáne 4 tálimgermen birge lagerge bara jatqan. Balalar óz tamaqtaryn jegen. Poıyz jolǵa shyqqannan keıin 1 jarym saǵat ótkende bala ózin jaısyz sezine bastaǵan. Poıyz brıgadasy nusqaýlyqqa sáıkes áreket etti. Naryn stantsııasyna jedel járdem shaqyryldy. Medıtsına qyzmetkerleri balanyń qaıtys bolǵanyn tirkedi», -delingen kompanııanyń aqparatynda.
Keıinnnen bala ólimine baılanysty arnaıy komıssııa quryldy.
Atyraý oblystyq bilim berý basqarmasynyń baspasóz qyzmetinen málim etkendeı, 77 adamnan turatyn top, onyń ishinde 4 tálimger, 73 bala «Atyraý-Astrahan» baǵytyndaǵy poıyzben jolǵa shyqqan.
«Atyraý oblystyq bilim berý basqarmasy quzyrly organdarmen birlesip, qaıǵyly oqıǵanyń barlyq mán-jaıyn tekserý úshin komıssııa qurdy. Poıyzda jolaýshylar ózder alǵan tamaqty ishkenin habarlaımyz. Qazirgi ýaqytta balanyń denesi sot-medıtsınalyq saraptamaǵa jiberildi. Atalǵan derekke baılanysty qylmystyq is qozǵaldy», - dep habarlady basqarmanyń baspasóz qyzmeti.
