Eshkimge kiná artpaımyz - Almatyda menıngıtten kóz jumǵan balanyń týystary
ALMATY. QazAqparat - Búgin tańerten menıngokok juqpasynan kóz jumǵan 5 jasar balany týystary jer qoınyna tapsyrdy, dep habarlaıdy QazAqparat tilshisi.
«Dárigerlerge de, balabaqsha men basseın ıelerine de kiná taqpaımyz. Aýrýdy qaıdan juqtyrǵanyn bilmeımiz ǵoı. Dárigerler qolynan kelgen kómekterin aıamady, qan aýystyrdy. Alaıda balany qutqaryp qalý múmkin emestigin aıtty. Kóz jumǵan balanyń ata-anasynyń jaǵdaıy aýyr. Bala týraly aqparat pen dárigerdiń qorytyndysy jelini sharlap, tipti sonaý Germanııadaǵy týystaryna jetken. Jeke málimetter ózge bireýdiń qolyna qalaı túskenin bilmeı otyrmyz. Muny taratýshyny tabý úshin prokýratýraǵa aryz jazamyz. Biz qaıǵyǵa batyp otyrmyz, al olar muny óz maqsattaryna paıdalanýda»,-dedi marqumnyń týystary.
Qaıtys bolǵan bala baryp júrgen balabaqsha karantınge jabyldy. Al balamen baılanysta bolǵan balalar juqpaly aýrýlar aýrýhanasy dárigerleriniń baqylaýynda.
Eske sala ketsek, 18-mamyr kúni 5 jasar bala balabaqshada aýyrǵan. Ata-anasy úıine alyp kelgen sátte balanyń qusýy jıilep, denesi bórtip, álsireı bastaǵan. Ata-anasy óz betterinshe balanyń dene qyzýyn ózderi túsire almaǵan soń dárigerdiń kómegine júgingen bolatyn. Іzinshe bala jansaqtaý bólimine túsip, kóz jumdy.
Araılym Joldasbaeva
