Eshkim jumystan qysqarmaıdy, baǵa qymbattamaıdy – Óskemendegi qus fabrıkasy
ÓSKEMEN. QazAqparat – Óskemen qalasyndaǵy qus fabrıkasynda tótenshe jaǵdaıǵa oraı sanıtarlyq baqylaý kúsheıtildi. Kásiporynda kún saıyn dezınfektsııalaý jumystary júrgizilip, barlyq jumysshylar medıtsınalyq maskalarmen qamtamasyz etilýde. Bul týraly QazAqparat tilshisine fabrıkanyń dırektory Rıshat Raısov aıtyp berdi.
«Óskemen qus fabrıkasy» AQ 1976 jyly qurylǵan. Іri otandyq kásiporyn 44 jyl boıy elimizdiń túkpir-túkpirindegi tutynýshylardy joǵary sapaly ónimdermen qamtamasyz etip keledi. Naqty aıtsaq, onda halyqaralyq standarttarǵa sáıkes keletin 30 muzdatylǵan, 32 salqyndatylǵan jáne 14 marınadtalǵan jartylaı daıyn ónimder shyǵarylady. 2019 jyly fabrıkada 29 myń tonna et ónimi óndirildi.
«Qazirgi ýaqytta biz burynǵy kestege sáıkes, 08.00-den 17.00-ge deıin jumys isteýdemiz. Biraq Qazaqstanda koronavırýske tosqaýyl qoıý úshin tótenshe jaǵdaı jarııalanǵanyna oraı, sanıtarlyq baqylaý kúsheıtildi. Kúnine 3-5 ret dezınfektsııalaý jumystary júrgizilýde. Fabrıka jumysshylaryn avtobýspen úıden alyp ketip, jetkizip tastaımyz. Sol avtobýstar da talapqa sáıkes zalalsyzdandyrylýda», - deıdi Rıshat Raısov.
Búginde kásiporynda 770 adam eńbek etedi. Ár kún saıyn olar jumysqa kelgende kireberiste teplovızormen tekseriledi. Fabrıkadaǵy 2 medıtsına qyzmetkeri de jumysshylardyń densaýlyǵyn udaıy baqylap, saqtyq sharalaryn túsindirip jatyr.
«Kásiporynǵa bógde eshkim kirgizilmeıdi. Antıseptıkter, jeke gıgıena zattary jetkilikti. Jumysshylar tolyqtaı medıtsınalyq maskalarmen qamtamasyz etilgen. Túski as kezinde olar ashanada birneshe topqa bólinip kezek-kezek tamaqtanady. Bir topta 10-15 adamnan. Sodan keıin ashana tazartylyp otyrady», - deıdi kásiporyn dırektory.
Onyń aıtýynsha, fabrıkada eshkim jumystan qysqartylǵan joq. Eńbekaqy da burynǵy kólemde ýaqytyly tólenýde. Sondaı-aq shyǵarylǵan ónim baǵalary da qymbattamaıdy.
