Eshkim meni tutqyndaǵan joq - Atyraý oblysynyń eks-ákimi B. Rysqalıevtiń kúıeý balasy R. Álbaqasov
ATYRAÝ. QazAqparat - Halyqaralyq izdeýde júrgen Atyraý oblysynyń eks-ákimi B. Rysqalıevtiń kúıeý balasy Rústem Álbaqasov óziniń Shveıtsarııada ustalǵany týraly aqparatty joqqa shyǵardy.
«Eshkim meni tutqyndaǵan joq. Meniń Jenevada esh sharýam joq, ol qalada shataǵym da joq. Qudaıǵa shúkir, aman-esenmin», - dedi beısenbi kúni R. Álbaqasov atalǵan aqparatty birinshi taratqan atyraýlyq «Aq Jaıyq» gazetine. Eske sala keteıik, Atyraý oblysy qarjy polıtsııasynda QazAqparat tilshisine bul aqparatty rastamady, biraq joqqa da shyǵarmady. Tek Rústem Álbaqasov óńirdiń burynǵy ákimi Bergeı Rysqalıevtiń UQT-ǵa qatysty qylmystyq is boıynsha halyqaralyq izdeýde júrgenin, al onyń isi oblystyq sotta qaralýda ekenin eske salýmen shekteldi.
Buǵan deıin eks-ákim B. Rysqalıevtiń otbasyna tıesili 100 mln. dollar kólemindegi qarjy Shveıtsarııa bankterinde anyqtalǵany resmı túrde habarlanǵan bolatyn. Al Rústem Álbaqasovtyń sot tóreliginen qaıda jasyrynyp júrgeni buǵan deıin habarlanǵan joq.
