Eshqandaı zań adam ómirin qoldan qııýǵa ruqsat bermeýi tıis – Bas prokýrordyń aǵa kómekshisi
«2005 jyly bizdiń el azamattardyń saıası quqyǵy týraly halyqaralyq paktige qol qoıdy. Atalǵan pakti adam quqyǵy salasyndaǵy álemdegi ekinshi mańyzdy qujat. Birinshi ol adam quqyǵy týraly halyqaralyq deklaratsııa. Azamattardyń saıası quqyǵy týraly halyqaralyq paktige sáıkes eshqandaı zań adam ómirin qoldan qııýǵa ruqsat bermeýi tıis. Sonymen qatar osy pakt aıasynda halyqaralyq qaýymdastyq ólim jazasynan alyp tastaý týraly qosymsha hattama ázirledi. Bul hattamany Qazaqstan bıyl 2 qańtarda ratıfıkatsııalady. Sodan soń bizge jańa zań jobasyn daıyndaý mindeti júkteldi. Bas prokýratýra zańdy ázirledi, Parlament qabyldap, keshe ǵana oǵan Memleket basshysy qol qoıyp bekitti. Zańdy qabyldaýǵa taǵy bir sebep, bizdiń el jyl basynda ólim jazasynan alyp tastaý týraly hattamany ratıfıkatsııalaǵannan keıin atalǵan jaza túrin alyp tastaýǵa mindetti boldyq», - dedi Rýslan Toqtaǵulov.
Mamannyń aıtýynsha, elimizde ólim jazasyn alyp tastaýdan asa bir ózgeris bolmaıdy.
«Óıtkeni, buǵan deıin bizde ólimge moratorıı boldy. Sondyqtan atalǵan salany úlken bir ózgeris kútip tur dep aıta almaımyn. Esesine ólim jazasynyń ornyna ómir boıy bas bostandyǵynan aıyrý bar. Bul óte aýyr jaza túri der edim. Osy oraıda óz basym elimizde ólim jazasyn alyp tastaýdy tolyq qoldaımyn. Onyń ústine bul halyqaralyq tájirıbe. Álemniń 150 eli ólim jazasyna tyıym saldy. BUU-ǵa múshe elderdiń kóbisi atalǵan jaza túrin áldeqashan alyp tastaǵan», - deıdi ol.
Sondaı-aq, bas prokýratýra ókili «lańkestik áreket úshin» ólim jazasyn qaldyrý kerek degenge qatysty pikir bildirdi.
«Meniń oıym, terrorıst ómirde óz tańdaýyn jasaǵan adam. Ony ólim jazasyna keskenmen másele túbegeıli sheshilmeıdi. Onyń ústine lańkestik áreket degenimiz ol qantógis. Al qanǵa qan degen bizdiń memlekettiń saıası ustanymyna múldem qaıshy. Sondyqtan kelispeımin», - dedi R. Toqtaǵulov.
Aıta keteıik, keshe Memleket basshysy ólim jazasyn alyp tastaıtyn zańǵa qol qoıdy.
