Eshqandaı ótemaqy medal men ánuranymdy aıtýǵa tatymaıdy - ıAsmına Toqsanbaeva
ALMATY. KAZINFORM – HH jazǵy Azııa oıyndaryna qatysqan sportshylardyń bir legi elge oraldy.
Almatyǵa ushyp kelgen sportshylardyń qatarynda marafondyq sporttyq júristen synǵa túsken jeńil atlet ıAsmına Toqsanbaeva da bar.
Eske salaıyq, otandasymyz Aıchı-Nagoıa qalasynda ótken Azııa oıyndarynyń jeńimpazy atanǵan bolatyn. Ol jeńil atletıkadan áıelder arasynda sporttyq júristen marafon qashyqtyǵyn 3 saǵat 22 mınýt 20 sekýnda baǵyndyryp, márege birinshi bolyp jetti.
Alaıda keıin onyń marafondyq sporttyq júristen kórsetken nátıjesi joıyldy. Oǵan sportshynyń aıaq kıimi jarysta bekitilgen tizimge sáıkes kelmeýi sebep boldy.
Keıin Qazaqstannyń jeńil atletıka federatsııasy Toqsanbaeva nátıjesi joıylǵanymen, oǵan jeńis úshin ótemaqy tolyqtaı tólenetinin habarlady.
Áýejaıda sportshy bul jaǵdaıǵa baılanysty pikir bildirdi.
- Týrızm jáne sport mınıstrliginen bastap jeńil atletıka federatsııasyna deıin osy bir qıyn sátte maǵan qoldaý kórsetip jatyr. Alda búkil sporttyq ómirim tur. Kelesi jyly álem chempıonatynyń medali úshin kúresemin. Bul meniń alǵashqy Azıadam boldy, - dedi ol.
Sportshy aıaq kıimine qatysty suraqtarǵa pikir bildirmedi. Alaıda jarystaǵy nátıjesiniń qaıta qaralýy týraly suraqqa jaýap berdi.
- Men úmittenip júrgen joqpyn, biraq biletinim: bári de qoldan kelgenniń bárin jasap jatyr, - dedi ol.
Sonymen qatar ıAsmına Toqsanbaeva altyn júldesiniń nátıjesi joıylǵanda qandaı sezimde bolǵanyn túsindirip, ózine qoldaý bildirgen jandarǵa alǵysyn aıtty.
- Osy jaǵdaıdy estigende bólmede jatqan edim. Denem tyrysyp, qatty kúızeliste boldym. Qasymda dáriger otyrdy. Іshteı «bári menen teris aınalady, heıt bolady» degen oılar keldi. Biraq bári kerisinshe boldy: tek Qazaqstannan ǵana emes, Meksıkadan, Qytaıdan da maǵan adamdar qoldaý bildirip jatyr, - dedi sportshy.
BAQ ókilderi sportshydan jarystaǵy nátıjesine baılanysty ótemaqy alǵanyn ne almaǵanyn surady.
- Men barlyq aqshany altyn medal men elimniń ánuranyn oryndaýǵa aıyrbastaıtyn edim, - dep jaýap berdi ol.
Eske salaıyq, Azııa oıyndarynyń júldegerleri Almatyǵa oraldy.
