Eshqandaı kózboıaýshylyq bolmasyn — Premer-mınıstr qysqy Olımpıadaǵa daıyndyq týraly

ASTANA. KAZINFORM — Úkimette Italııada ótetin qysqy Olımpıada oıyndaryna otandyq sportshylardyń daıyndyǵy pysyqtaldy. Premer-mınıstr Oljas Bektenov bul oıyndar elimizdiń halyqaralyq ımıdjin nyǵaıtý isinde óte mańyzdy ról atqaratynyn atap ótti.

— Prezıdent buqaralyq jáne kásibı sportty damytý árkez basymdyqqa ıe bolyp qala beretinin aıtyp keledi. Sondyqtan Qazaqstanda sportty damytý baǵytynda keshendi sharalar qabyldanyp, sportshylardyń sapaly daıarlanýy úshin tıisti jaǵdaı jasalýda. 2023-2025 jyldary osy maqsattarǵa bıýdjetten 360 mıllıard teńgeden astam qarajat bólindi, — dedi O. Bektenov Úkimettiń búgingi otyrysynda. 

Qysqy sport túrlerin damytý úshin elimizde qajetti bazalyq ınfraqurylym men qolaıly klımattyq jaǵdaılar bar. Bul oraıda salalyq sport federatsııalary basty ról atqarady. Solardyń deńgeıinde ulttyq komandalar, jattyqtyrýshylar quramy men sport rezervi jasaqtalyp, naqty sport túrlerin damytýdyń uzaqmerzimdi strategııasy aıqyndalady.

— 2024 jyly Kanvon qalasynda ótken jasóspirimder arasyndaǵy Olımpıada oıyndaryndaǵy qazaqstandyq sportshylardyń tabysyn sport rezervin daıarlaýdyń mańyzdy nátıjesi dep baǵalaýǵa bolady. Bul jetistikti alda Italııada ótetin qysqy Olımpıada oıyndarynda odan ári nyǵaıtyp, eseleı túsý qajet. Jalpy sportshylarymyzdyń ishki tártibi, tabandy, alǵyr jáne naǵyz komandalyq rýhy olardy jeńis jolyna jeteleıdi dep senemiz. Ulttyq Olımpıada komıtetiniń prezıdenti Gennadıı Golovkın óziniń qaısar rýhymen sportshylarymyzdyń jigerin janyp, jeńiske yntalandyrady. Elimiz sizderdi maqtan tutady ári zor senim artady, — dedi Úkimet basshysy. 

Premer-Mınıstr baıraqty básekeniń bastalýyna sanaýly kúnder qalǵanyn, barlyq daıyndyq sharalary tolyq kólemde aıaqtalýy qajet ekenin aıtty. Osyǵan baılanysty Týrızm jáne sport mınıstrligine Ulttyq Olımpıada komıtetimen birlesip, ulttyq quramanyń tolyq daıyndyǵyn qamtamasyz etýdi tapsyrdy. 

— Túpkilikti quramdy bekitý, logıstıka, kerekti jabdyqtar, medıtsınalyq qoldaý jáne uıymdastyrý máselelerin tez arada retteý qajet. Eshqandaı kózboıaýshylyq bolmasyn. Syrtqy ister mınıstrligine dıplomatııalyq arnalar arqyly jan-jaqty qoldaý kórsetýdi tapsyramyn, — dedi O. Bektenov. 

Sonymen birge, Úkimet basshysy bıýdjet qarajatyn tıimdi paıdalanýǵa basa mán berý keregin atap ótti. 

— Keleshegi bar sportshylarǵa kórsetiletin qoldaý sharalary naqty ári ashyq bolýǵa tıis. Buǵan mınıstrlikterdiń, federatsııalar men vedomstvolyq baǵynystaǵy uıymdardyń basshylary tikeleı jaýapty bolady. Sondaı-aq kásipqoı sportty damytýǵa bıýdjetten tys qarajat tartýǵa kúsh salý kerek. Týrızm jáne sport mınıstrligi Ulttyq paralımpıada komıtetimen birlesip, Ulttyq komandanyń qysqy paralımpıada oıyndaryna daıyndyq jumystaryn kúsheıtsin. Paralımpıada sportshylarynyń iri halyqaralyq jarystarǵa qatysýy órshil rýh pen tózimdilikti tárbıeleý jáne ınklıýzıvti qoǵam qundylyqtaryn nasıhattaý turǵysynan mańyzdy, — dedi ol. 

Aıta keteıik, elimizde qysqy Olımpıadaǵa daıyndyqqa 13,3 mlrd teńge bólingen. 

Buǵan deıin Týrızm jáne sport mınıstri Erbol Myrzabosynov jarys nátıjesine qandaı boljam jasap otyrǵanyn aıtty.