«Eshqandaı qobaljý joq»: Mektep oqýshylary men ata-analar Pfizer vaktsınasy jaıly
NUR-SULTAN. QazAqparat - Elorda mektepterinde oqýshylardy koronavırýsqa qarsy Pfizer preparatymen vaktsınalaý júrip jatyr, dep habarlaıdy QazAqparat qala ákimdiginiń resmı saıtyna silteme jasap.
«Búgin koronavırýsqa qarsy Pfizer vaktsınasyn alamyn. Azdap qobaljyǵanym ras. Biraq ekpeniń kómegimen pandemııa jaǵdaıyna qaramaı kóshede emin-erkin júre alatynymdy bilemin. Ekpe almaǵan balalarǵa qaraǵanda kóbirek múmkindikke ıe bolamyn jáne aýyryp qalýdan qoryqpaımyn», - dedi mektep oqýshysy Olga Býtakova.
Oqýshynyń anasy ıÝlııa Býtakova KVI-ge qarsy ekpeni kezeksiz alý múmkindigi berilgenine qýanyshyn jasyrmady.
«Búgin Pfizer vaktsınasyn alamyn. Bul óz densaýlyǵymdy bolashaqta qaýipsiz etedi dep sanaımyn», - dep óz oıymen bólisti oqýshy Dınara Amangeldi.
Óz kezeginde ata-analar balalarǵa vaktsına salý protsesin baqylaýǵa múmkindik berilgenine alǵys aıtty.
«Balam Pfizer ekpesin alady. Vaktsınatsııa mektep qabyrǵasynda ótip, oǵan ata-analardyń qatysýyna múkindik bergenine rızamyn. Pfizer vaktsınasyna senemin, sondyqtan qoryqpaımyn», - dedi Ásemgúl Ábdihalyqova.
Synyp jetekshisi Zeınep Іstemesovanyń aıtýynsha, óz oqýshylarynyń ekpe alýy ózge balalarǵa qorqynyshty jeńýge úlgi bolady.
«Synybymdaǵy oqýshylar búgin vaktsınatsııadan ótip jatyr. Bul - balanyń densaýlyǵy úshin mańyzdy dep esepteımin. Ekpe alǵandar COVID-19 vırýsyn juqtyrǵannyń ózinde aýrýdy jeńil ótkizedi. Oqýshylarymnyń ekpe alýy ózgelerge úlgi bolady», - dedi ol.
Aıta keteıik, elordada júkti, bala emizetin áıelderdi jáne balalardy Pfizer preparatymen vaktsınalaý 15 qarashada bastaldy.
