Eshqandaı baqylaý joq – Mádenıet mınıstrligi mýzeılerdegi máseleni qalaı sheship jatyr

ASTANA. KAZINFORM — Tsıfrlandyrý mádenıet salasyndaǵy sybaılas jemqorlyqqa tosqaýyl qoıady. Bul týraly Mádenıet jáne aqparat mınıstriligi málim etti.

— Tsıfrlyq arhıv baǵdarlamasy aıasynda birqatar jumys atqarylyp jatyr. Arhıvterdegi kóptegen qujatty tsıfrlyq formatqa engizdik. Prezıdent tapsyrmasy boıynsha birneshe óńirde jańa nysandar salynýda, biraq tapshylyq áli de bar. Qujattardy saqtaıtyn oryn jetispeıdi jáne qaýipsizdik máselesi de bar. Bul qujattar joǵalsa, ony úlken qaýip dep sanaımyz. Sondyqtan tsıfrlandyrý derekterdi saqtaý máselesin sheshedi, - delingen mınıstrliktiń Kazinform agenttigine bergen jaýabynda. 

Sonymen qatar vedomstvo vırtýaldy mýzeıler jelisin keńeıtý qolǵa alynǵanyn eske saldy. Qazir biraz mýzeıdegi jádigerlerdi vırtýaldy tamashalaý múmkindigi bar. 

— Qarajattyń osy mekemelerdiń esep-shotyna durys túsýin qadaǵalaý mańyzdy. Bul rette tsıfrlandyrýdyń múmkindigi zor. Qazir naqty bir nysanǵa qansha adam kirgenin baqylaý úshin Face ID ornatyp jatyrmyz. Sol arqyly mýzeıge kelgen adam sany kórinedi. Bul qadamdar sybaılas jemqorlyqtyń aldyn alýǵa yqpal etedi. Máselen, bireýler kassaǵa nemese kireberistegi jáshikterge aqsha salsa, keıbiri bank qosymshasy arqyly aýdarym jasap jatady. Osydan keıin qarajattyń naqty qaıda túsip jatqany belgisiz bolady. Barlyq nysanǵa Face ID engizip, kassanyń jáne qaıyrymdylyq jáshikterdiń jumysyn avtomattandyrsaq, biraz másele sheshiledi, - deıdi mınıstrlik ókilderi. 

Buǵan deıin arhıv qyzmetkerleriniń jalaqysy ósetinin jazǵan edik.